İraqda “Darurrəsulul-Əzəm” adlı dördüncü beynəlxalq konfransın bağlanış mərasimi keçirildi
“İQNA”-nın “Əl-Kəfil” kanalına istinadən verdiyi xəbərə görə, “Darurrəsulul-Əzəm (s)” adlı dördüncü beynəlxalq elmi konfransın bağlanış mərasimində yekun bəyanat oxunub və orada Peyğəmbər (s) həyatının yenidən araşdırılmasının zəruriliyi qeyd olunub.
Bu konfrans “Mübarək Nəbi Sünnəsi: Qurani sabitliklər və elmi metodların dəyişkənlikləri arasında” mövzusu ilə Darurrəsulul-Əzəm (s) mərkəzi (Həzrət Abbas (ə) Hərəminin Fikri və Mədəni İşlər Şöbəsinə bağlı qurum) və Əl-Əmid Universitetinin Qızlar üçün Əsas Təhsil Fakültəsi tərəfindən təşkil olunub.
Peyğəmbərin (s) həyatına həsr edilmiş bu konfrans 2025-ci il noyabrın 7 və 8-də, müqəddəs Kərbəla şəhərində keçirilib.
Yekun bəyanatda aşağıdakı məsələlər vurğulanıb:
Peyğəmbər (s) həyatının elmi şəkildə öyrənilməsi, müasir metodlardan istifadə olunması və hadisələrin mahiyyəti, konteksti və şəraiti ilə uyğun şəkildə təhlil edilməsinin vacibliyi;
Şərqşünasların Peyğəmbər (s) həyatı haqqında yazdıqları əsərlərin tərcüməsinə çalışmaq, çünki mütəxəssislər bu əsərlərin elmi dəqiqliyini və əhəmiyyətini vurğulayırlar;
Peyğəmbər (s) həyatı barədə ən yaxşı kitab üçün müsabiqə elan etmək, tədqiqatçıları təşviq etmək və bu sahədə elmi rəqabət mühiti yaratmaq;
Həzrət Məhəmmədin (s) şəxsiyyəti və mübarək həyatı ilə bağlı magistr və doktorantura layihələrini dəstəkləmək;
Peyğəmbər (s) haqqında elmi tədqiqatlarda fənlərarası metodlardan istifadə etmək, müxtəlif elmi sahələrin təklif etdiyi vasitə və üsullardan yararlanmaq və bu yolla sünnə tədqiqatlarında intellektual inteqrasiya əldə etməyə çalışmaq;
Peyğəmbər (s) həyatı üzrə mütəxəssisləri seminar və təlimlərdə iştirak etdirmək, elmi məsləhətləşmə və əməkdaşlığı gücləndirmək;
Gələcəkdə keçiriləcək beşinci konfransın mövzusunun “Qurani Nəbi Sünnəsi: mətndə orijinallıq və təfsirlərdə fərqliliklər” olacağı;
Sünnə tədqiqatları sahəsində müxtəlif universitetlərdə çalışan tədqiqatçıların fəaliyyətini qiymətləndirmək məqsədilə “10 ən yaxşı akademik dissertasiya” üçün üçüncü mərhələ müsabiqəsinin təşkili;
Peyğəmbər (s) haqqında yazılmış əlyazmaların toplanması, onların tənqidi nəşrinin hazırlanması və nəşri istiqamətində səylərin artırılması, bu işdə alim və mütəxəssislərə dəstək verilməsi;
Peyğəmbər (s) və Onun mübarək həyatı ilə bağlı ədəbi və mədəni müsabiqələri dəstəkləmək, müxtəlif təbəqələrdən iştirakçıları cəlb etməklə orijinal İslam mədəniyyətini yaymaq və təşviq etmək.
4315806
