Qəzzada soyqırım səbəbilə “Ginnes” sionist rejimi boykot etdi
“İQNA”-nın məlumatına görə, sionist rejimin “12-ci televiziya kanalı” xəbər verib ki, beynəlxalq rekordların qeydiyyatı ilə tanınan “Ginnes” qurumu fələstinlilərə qarşı davam edən ölümcül hücumlar səbəbilə İsraillə əməkdaşlığını dayandırıb.
Məlumata əsasən, böyrəyin könüllü ianəsini təşviq edən İsrail “Hədiyyə həyat” assosiasiyası dünya rekordu qeydiyyatına başlamaq üçün “Ginnes” hakimlərinə müraciət edib; lakin bu müraciət açıq cavabla – “Biz İsrailin müraciətlərinə baxmırıq” – rədd olunub.
Bu qərar geniş ictimai təzyiqlər və insan haqları təşkilatlarının çağırışları nəticəsində qəbul edilib. Onlar sionist rejimi soyqırım törətməkdə və beynəlxalq qanunları açıq şəkildə pozmaqda ittiham ediblər. Rəsmi statistikaya görə, 7 oktyabr 2023-dən başlayaraq İsrailin Qəzzaya hücumları nəticəsində 70 mindən çox fələstinli şəhid olub, təxminən 171 min nəfər yaralanıb ki, onların əksəriyyəti qadınlar və uşaqlardır.
Yayımlanan bəyanata görə, “Ginnes” vurğulayıb ki, gələcəkdə də İsraildən heç bir rekord qeydiyyata alınmayacaq və bu rejimlə bağlı bütün müraciətlər gündəlikdən çıxarılıb. Bu addım simvolik bir sanksiya olaraq dünya ictimaiyyətinin Təl-Əvivə açıq mesajıdır: “Qəzzada törədilən cinayətlər təkcə siyasi legitimliyi deyil, həm də bu rejimin mədəni və ictimai mövqeyini sual altına qoyur”.
Mütəxəssislər hesab edirlər ki, bu qərar sionist rejimə qarşı mədəni və ictimai sanksiyaların yeni dalğasının başlanğıcı ola bilər; belə bir dalğa daha əvvəl idman və akademik sahələrdə də özünü göstərmişdi. Bu kontekstdə insan haqları fəalları digər beynəlxalq qurumları da “Ginnes”i izləməyə və İsraili sistematik insan haqları pozuntularına görə təzyiq altına almağa çağırıblar.
Bu, beynəlxalq qurumların İsrailə qarşı mövqe bildirməsinin ilk nümunəsi deyil; daha əvvəl də beynəlxalq təşkilatlar və tanınmış şəxslər Təl-Əvivin Qəzzadakı hərəkətlərini “bəşəriyyətə qarşı cinayət” adlandırmışdılar. İndi isə qlobal mədəni simvol olan “Ginnes”in boykotu bir daha beynəlxalq ictimaiyyətin fələstinlilərə qarşı məsuliyyətini gündəmə gətirib.
“Ginnes Dünya Rekordları” 1954-cü ildə Londonda təsis olunub və müxtəlif sahələrdə dünya rekordlarını sənədləşdirən ilk kitabı nəşr edib. Hazırda şirkət yalnız kitaba əsaslanmır, rekord sahiblərindən ödəniş alır və hər il onların şərəfinə bir neçə tədbir təşkil edir.
4320732
