Qüdsün xristian lideri: “Məscidül-Əqsaya qarşı hər bir təhdid, kilsələrə qarşı təhdiddir”
“İQNA”-nın “Arabi 21” qəzetinə istinadən verdiyi xəbərə görə, Qüdsün xristian liderlərindən Yepiskop III Teofilus çıxışında sionist rejimin Məscidül-Əqsa’ya qarşı həyata keçirdiyi tədbirləri pisləyərək əlavə edib: “Xristian sionizmi müqəddəs kitabları siyasi məqsədlər üçün sui-istifadə etməyə çalışır.”
O vurğulayıb: “Müsəlmanlar əsrlər boyu Yaxın Şərqdə mövcud olmuş xristian kilsələrini dağıdanlar deyil. Əslində, xristianlığı kökündən məhv etməyə çalışanları gizlətmək üçün diqqəti başqa istiqamətə yönəltmək istəyənlər var.”
Qüds, Fələstin və İordaniya yepiskopu Teofilus III əlavə edib: “Haşimilər tərəfindən müqəddəs torpaqlardakı İslam və xristian məbədlərinə himayədarlıq bölgədə artan gərginlik və çətinliklər arasında tarazlığı qorumaq üçün güclü bir qüvvə və əsas sütundur.”
O, müqəddəs məkanlara azad giriş hüququnun davamlı şəkildə pozulmasına işarə edərək, xristianların mövcudluğunu hədəf alan real mövcudiyyət təhdidi barədə xəbərdarlıq edib.
Pravoslav yepiskop həmçinin “tarixi status-kvo”nun aşınması və radikal məskunlaşan qrupların Məscidül-Əqsa’ya qarşı narahatedici hücumları ilə bağlı dərin narahatlığını ifadə edərək, bu cür hərəkətlərə qəti şəkildə qarşı çıxdığını bildirib.
Digər tərəfdən, Qüds İşləri üzrə Kral Komitəsinin baş katibi Abdullah Tofiq Kənan bəyan edib ki, bu il bütün dünyada keçirilən Milad bayramı Qüdsün tamamilə fərqli bir şəraitdə baş tutur. Şəhər hazırda işğalçı israillilərin tətbiq etdiyi mühasirə və məhdudiyyətlərin acı reallığını yaşayır ki, bu da şəhərin müqəddəsliyini və dini-tarixi əhəmiyyətini açıq şəkildə pozur.
Kənan İordaniya xəbər agentliyi ilə müsahibəsində əlavə edib: “Sülh şəhəri indi işğalçılıq çəkici ilə məcburi köçkünlük, yəhudiləşdirmə, həbslər və təkrarlanan hücumların dəmiri arasında qalıb. İşğalçılar fələstinlilərə qarşı apardıqları genişmiqyaslı müharibədə nə xristianlarla müsəlmanlar, nə də onların müqəddəs məkanları arasında fərq qoyurlar. Hamı təqib və təzyiq siyasətinə məruz qalır.”
O qeyd edib: “Statistikalar göstərir ki, Fələstində xristianların sayı 1948-ci ildə təxminən 150 min nəfərdən hazırda 45 min nəfərə qədər azalıb.”
Kənan vurğulayıb: “İşğalçılar Qüdsdə xristianların mövcudluğunu Qərbə fələstinli rəvayətini ötürmək üçün körpü hesab edirlər və faktları təhrif edərək, saxta sionist rəvayətini yaymaqla onları mühasirəyə almağa çalışırlar.”
O əlavə edib: “Qüdsdəki xristianlar ciddi iqtisadi təzyiqlərdən əziyyət çəkirlər. Ən mühümləri kilsələrə tətbiq edilən ağır vergilər – o cümlədən ‘Arnona’ vergisi, bank hesablarının dondurulması, mülklərin və müqəddəs məkanların müsadirəsi, həmçinin ‘Atret Kohanim’ kimi məskunlaşma təşkilatlarının xristianların vəqf mülklərini icarə və ya mülkiyyət iddiası bəhanəsi ilə ələ keçirmə fəaliyyətləridir.”
4324937
