Əl-Əzhər şeyxi misirli görmə məhdudiyyətli hafizi təltif etdi
“İQNA”-nın “Bisaraha”ya istinadən verdiyi xəbərə görə, Məryəm Əbdüləziz görmə qabiliyyətini itirməsinə baxmayaraq, Qurani-Kərimin tamamını əzbərləməyi bacarıb. Əl-Əzhər şeyxi onun güclü iradəsini, elmi və Quran sahəsindəki üstünlüyünü vurğulayaraq bildirib ki, o, Əl-Əzhər tələbələri və uca məqsədlərə sahib insanlar üçün nümunədir.
Əhməd ət-Tayyib bu Əl-Əzhər tələbəsinin qiraət və təcvid qaydalarına yüksək səviyyədə bələdliyini tərifləyib və qeyd edib ki, onun əldə etdiyi nailiyyət parlaq bir üstünlük nümunəsidir və göstərir ki, qətiyyət və iradə çətinlikləri dəf edib böyük uğurlara aparır.
Əl-Əzhər şeyxi misirli bu tələbəni elmi və Quran fəaliyyətlərində sabitqədəm olmağa, daha böyük uğurlar qazanmağa çalışmağa təşviq edib və onun dəstəklənməsində anasının və ailəsinin rolunu yüksək qiymətləndirib.
Əl-Əzhər şeyxi bu misirli görmə məhdudiyyətli hafizin dəstəklənməsinin, onun təhsil və yaşayış ehtiyaclarının təmin edilməsinin vacibliyini vurğulayaraq bildirib ki, Əl-Əzhər həmişə uca məqsədlərə sahib insanları gücləndirməyə və elmi-dini sahələrin bütün istiqamətlərində inkişaf və yaradıcılıq üçün imkanlar yaratmağa çalışır.
Bu arada, yaxın günlərdə Misirdə keçirilən “İslam Əməkdaşlıq Təşkilatına üzv ölkələrdə qadınların hüquqlarının qorunması və inkişafında dini və media diskursundan istifadə” adlı konfrans Məryəm Əbdüləzizin Quran tilavəti ilə açılıb.
Misir prezidentinin dəstəyi ilə, Misir Milli Qadınlar Şurası, Əl-Əzhər İslam Mərkəzi və Qadınların İnkişafı Təşkilatı (WDO) əməkdaşlığı ilə keçirilən bu beynəlxalq konfrans İƏT-ə üzv 57 ölkənin iştirakı ilə 12–13 bəhmən tarixlərində baş tutub. Konfransın məqsədi dini və media diskursunun imkanlarından istifadə etməklə İslam dünyasında qadınların hüquqlarının gücləndirilməsi üçün davamlı və mədəni çərçivə yaratmaq olub.
4332790
