Qahirədə 1500 ədəd icazəsiz Quran müsadirə edildi
“İQNA”-nın “Veto” portalına istinadən verdiyi xəbərə görə, ixtisaslaşmış polis şöbəsinin tabeliyində fəaliyyət göstərən Ümumi Müəlliflik Hüquqları və Əqli Mülkiyyətin Qorunması İdarəsinin topladığı məlumat və apardığı araşdırmalar təsdiqləyib ki, Darb əl-Əhmar polis bölməsinin ərazisində yerləşən kitab mağazasının sahibi icazəsiz şəkildə Qurani-Kərim nüsxələrinin satış və paylanması ilə məşğul olub.
Təhlükəsizlik qüvvələri mağazaya daxil olaraq onun müdiri saxlayıblar və orada heç bir rəsmi icazəsi olmayan 1500 ədəd Qurani-Kərim nüsxəsi aşkarlayıblar.
Şübhəli şəxs sübutlarla üzləşdirildikdən sonra mağaza sahibi ilə əlbir olaraq qanunsuz qazanc əldə etmək məqsədilə bu pozuntunu törətdiyini etiraf edib.
Zəruri hüquqi prosedurlar həyata keçirilib və məsələ üzrə araşdırmalar birbaşa səlahiyyətli orqanlara həvalə olunub.
Digər tərəfdən, Müəlliflik Hüquqları və Əqli Mülkiyyətin Qorunması İdarəsi Abidin polis bölgəsində yerləşən icazəsiz bir çapxananın rəhbərini də saxlayıb. Bu həbs onun müvafiq dövlət qurumlarından icazə almadan çoxsaylı kommersiya nəşrləri çap etdiyinin təsdiqlənməsindən sonra baş verib.
Araşdırmalar göstərib ki, həmin çapxana əqli mülkiyyət qanunlarını pozaraq və qanunsuz qazanc əldə etmək məqsədilə 10 mindən çox kommersiya nəşri istehsal edib.
Çapxananın müdiri dindirildikdən sonra pozuntularını etiraf edib. Bütün lazımi hüquqi prosedurlar tamamlanıb və o, əlavə araşdırmalar üçün müvafiq prokurorluğa təhvil verilib.
4351973
