د مصري قاريانو پيغامونه: استاد عبایي د قرآني سياليو په قضاوت کې يو بېمثاله شخصیّت ؤ
ایکنا - د مصر يو شمېر نامتو قاريانو او داورانو د استاد عبدالرسول عبایي د وفات په اړه په جلا جلا پيغامونو کې خواشينی څرگندونه کړې او ټينګار ئې کړی چې هغه د قرآني سياليو په قضاوت کې يو بېمثاله اسوه وه.
د ايکنا د راپور له مخې،د مصر يو شمېر مشهورو قاريانو اوقاضیانو( داورانو)لکه شيخ عبدالفتاح الطاروطي، شيخ احمد فرج الله الشاذلي،طه محمد عبدالوهاب،شيخ محمد علي جابين او شيخ عبدالله عبدالله په جلا جلا پيغامونو کې د استاد عبایي وفات د ايران ولس، قرآني ټولنې او د هغه کورنۍ ته تسليت ووايه.
د مصر د مشهور قاری احمد فرج الله الشاذلي، د تسليت پيغام
استاد عبدالرسول عبایي يو مهربان او دلسوز پلار و چې کله به مو ورسره لومړی ځل ليدل، ګواکې له پخوا مو پېژانده. ما هغه يو مهربان، سخي،مخلص، روښانه روح لرونکی، نصيحت کوونکی، امانتدار او د ټولو خوښ شخص وليد. د هغه روح مهربان او مقبول و. د قرآن د قرائت په هنر، د تلفظ او تجويد د احکامو په پوهه سربېره، هغه يو مخکښ استاد و چې بيا به يې تکرار سخت وي. د هغه نه شتون يو نه جبرانېدونکی زيان دی او وخت به په سختۍ سره د شيخ عبدالرسول عبایي په څېر يو سړی، چې د ادب استاد او لوړ اخلاق يې درلودل، وويني.
زه ددې غم په مناسبت د اسلامی ايران ملت ته تسليت وايم او له الله تعالی د مرحوم لپاره مغفرت، پراخه رحمت، او مونږ ټولو ته صبر او لوي اجر غواړم. هيله ده الله تعالی هغه له انبياوو، صديقينو، شهيدانو او صالحينو سره محشور کړي؛ «وَحَسُنَ أُولَئِكَ رَفِيقًا». مونږ د الله يوو او هماغه ته به ورگرځو. د الله درود زمونږ پر مولا حضرت محمد (ص) او د هغه پر اهل بيت او اصحابو وي؛ يارب العالمين.
د مصر د یو مشهور قاري ډاکتر عبدالفتاح الطاروطي د تسليت پيغام
السلام عليكم ورحمة الله وبركاته
بسم الله الرحمن الرحيم
«وَبَشِّرِ الصَّابِرِينَ* الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ* أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ».
زه د مصر د قرآني کورنۍ په استازيتوب د دغه قدرمن شخصیّت، استاد عبدالرسول عبایي (رحمت الله عليه) د وفات په مناسبت د ايران اسلامي جمهوريت درست ملت اوقراني ټولنې ته تسليت وايم.
عبدالرسول عبایي زمونږ استاد او زمونږ د زړونو محبوب و. مونږ د قرآني سياليو او محفلونو په قضاوت کې له هغه سره ډېرې ښې تجروبې درلودې. مرحوم عبایي يو لوی پلار، ستر استاد او قدرمن ملګری و. له الله تعالی غواړم چې د هغه د قرآن او قرآنيانو لپاره د خدمتونو په بدل کې پر هغه رحمت وکړي، هغه له صالحينو سره قبول کړي، د هغه کورنۍ ته ښه بدله ورکړي، زمونږ زړونه کلک کړي او هغه ته د جنتيانو په ډله کې ځای ورکړي.
د مصر د یوه مشهور نعت خوان او مداح شيخ محمد علي جابين د تسليت پيغام
د ستر قرآني عالم او هغه سړي وفات چې خپل ژوند يې د ايران په اسلامي جمهوريت او اسلامي نړۍ کې د الله کتاب خدمت ته وقف کړی و، د قاري استاد عبدالرسول عبایي د رحلت په مناسبت درستې قرآني کورنۍ ته تسليت وايوو. د يو قاري له لاسه ورکول لوی غم دی او زموږ خفگان د هغه اغېز له امله دی چې استاد عبایي د ايران د اسلامي جمهوريت په راتلونکي قاري نسل باندې درلود... «إِنَّا لِلَّهِ وَإِنَّا إِلَيْهِ رَاجِعُونَ».
د مصر د یوه مشهور قاضي ډاکتر طه عبدالوهاب او د مقاماتو د موسيقۍ کارپوه د تسليت پيغام
«إِنَّا لِلَّهِ وَإِنَّا إِلَيْهِ رَاجِعُونَ»
اسلامي امت خپل يو له مهمو قرآني پوهانو، ستر عالم عبدالرسول عبایي (رحمة الله عليه) له لاسه ورکړ. ټولو نړيوالو ملګرو، دوستانو او قاضیانو او داورانو ته چې په نړيوالو سياليو کې له مرحوم سره اشنا شول او په هغه کې يې پلار، ورور او استاد وليد، او د قضاوت او ادب ډېرې طريقې يې ترې زده کړې،د زړه له کومې تسليت وايم. همدا راز دا غم ټولو هغو ته چې دا ستر عالم، ډاکتر عبدالرسول عبایي يې خوښاوه، تسليت وايم. له الله تعالی غواړم چې هغه له انبياوو، صديقينو او شهيدانو سره محشو رکړي او قرآن کريم، چې د هغه ژوند يې خدمت ته وقف کړی و، د هغه او مونږ ټولو لپاره شفيع شي.
د یوه بل مصری قاری شيخ عبدالله عبدالله د تسليت پيغام
بسم الله الرحمن الرحيم
«وَبَشِّرِ الصَّابِرِينَ* الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ».
په دې دردناکو شیبو کې، د یوه لوي عالم، اديب او فداکار قاري، د ايران د قرآن کريم فقيد استاد عبدالرسول عبایي وفات په مناسبت د قرآن لیوالو او درستې ټولنې ته تسليت وایم.
