جامعة المصطفى العالميه پوهنتون؛په اسلامي نړۍ کې د ایران د علمي ډیپلوماسۍبیلګه(مقاله)
یکنانیوز د پارس ټوډې له قوله راپور راکوي،جامعة المصطفى العالميه، د ایران د اسلامي جمهوریت نړیوال پوهنتون دی، چې د حوزوي هوّیت لرونکی علمي او تعلیمي بنسټ دی. دا نړیوال علمي مرکز په ۲۰۰۸ کال کې د «بهرنیو حوزو او علمي مدرسو ادارې » او «د اسلامي علومو نړیوال مرکز» د یوځای کېدو په پایله کې د غیر ایرانيو طلبه ؤ د روزنې او اسلامي علومو د پراختیا په موخې سره تاسیس شو.
جامعة المصطفى العالميه په ۲۰۰۸ کال کې د ایران په قم ښار کې د امام خمیني (ره) عالي مدرسې په غیر ایرانيو طلابو سره پیل شوه او د اسلامی انقلاب د ستر لارښود د پیغام په لوستل کیدا سره ئې خپل فعالیتونه پیل کړل. د اسلامی انقلاب معظم رهبر په خپل پیغام کې د عالي انقلاب کلتوري شورا، د مذهبونو د نزدیکت له نړیوالې ټولنې او د اهل بیت نړیوالې ټولنې سره د دغه نوي تاسیس شوي بنیاد د ملګرتیا پر اړتیا ټینګار وکړ،څو جامعة المصطفى د نړۍ د اوسمهاله اړتیاوو په ځواب ویلو کې علمي مرکزونو ته پراختیا ورکړل شي.
نړیواله پراختیا او د څانګو او شعبو ډولوالی
د جامعة المصطفى په ویبپاڼې کې د خپرو شویو شمېرو له مخې، دغه فاؤنډیشن یا بنسټ تر اوسه پورې له ۱۲۲ ملیتونو څخه له پنځوسو زرو زیات نارینه او ښځینه محصلین روزلي او فارغ التحصیل کړي دي. د اهل سنت محصلین هم په دغه پوهنتون کې زدهکړې کوي.
جامعة المصطفى پوهنتون د ایران په داخل او بهر کې له ۱۷۰ څخه زیاتو تعلیمي څانګو او په ۶۰ هېوادونو کې د فعالیت له لارې د اسلامي، انساني، کلتوري او ژبني علومو د زدهکړې لپاره پراخه زمینه برابره کړې ده . په دغه مرکز کې شعبې یا څانګې لکه فقه، اصول، قرآن، حدیث، فلسفه، عرفان، اخلاق، کلام، د اسلام تاریخ، حقوق، ارواپوهنه، اقتصاد، سیاسي علوم، اړیکې، مدیریت او د فارسي، عربي، انګلیسي، فرانسوي او روسي ژبو تدریس کیږي، چې ټول ئې د اسلامي لیدلوري پر بنسټ دي.
نړیوال محصلین؛ د علم او کلتور سفیران
د المصطفى پوهنتون فارغ التحصیلان ، چې د مختلفو ملیتونو، دیني او کلتوري اساس او ریښه لرونکي دي، د خپلو زدهکړو له بشپړولو وروسته علم، کلتور او د تمدنونو د خبرو اترو سفیرانو په توګه پخپلو هېوادونو کې فعالیت کوي. دا مرکز د حوزې او پوهنتون له تکړه استادانو څخه په استفادې سره، د لوړو زدهکړو بهیر د بشپړ وخت، نیمه وخت، تعلیمي او افتخاري استادانو په ترکیب سره مدیریت کوي.
د مجازی زدهکړو او مطالعاتی فرصتونو پراختیا
جامعة المصطفى له لیرې (آنلاین) د زدهکړو د پراختیا په موخې سره خپل مجازی یا آنلاین پوهنتون هم افتتاح کړی دی. دا پوهنتون د ماډرن ټکنالوژۍ په کارولو سره د ۷۰ ملیتونو محصلینو ته د زدهکړو فرصت برابر کړی او د برېښنائي یا ډیجیټلي کتابونو، تعلیمي سافټ ویرونو(نرم آوزارونو) او درسي موادو په تولید سره ئې د اسلامي زدهکړو په پراختیا کې مهم رول لوبولی دی. همدارنګه، د دغه مرکز د لنډمهاله زدهکړو او مطالعاتی فرصتونو موسسه د نړۍ له ګوټ ګوټ څخه د استادانو، څېړونکو او د پي ایچ ډی محصلینو کوربه توب کوي او د ایران او د اسلامي نړۍ د پوهانو ترمینځ د علمي تعامل زمینه برابروي.
ملاتړي خدمتونه او نړیوالې بریاوې
جامعة المصطفى د غیر ایرانيو محصلینو او د هغوی د کورنیو د شتون په پام کې په نیولو سره پراخ خدمتونه وړاندې کوي، لکه د ویزې او تحصیلي اقامې ترلاسه کول، د فیسونو او استوګنې مرستې، لیلیې، روغتیایي خدمتونه، تعلیمي او تربیتي مشورې او سپورټي اسانتیاوې. همدارنګه، د طلبه ؤ د مېرمنو او ماشومانو لپاره عملي او مهارتي زدهکړې هم په پام کې نیول شوي دي.
په تازه نړیوالې بریا کې، د جامعة المصطفى واګادوګو څانګه، چې د بورکینافاسو په پلازمېنه کې موقعیت لري، په ۲۰۲۵ کال کې د دغه هېواد د خصوصي لوړو زدهکړو د موسیسو ترمینځ لومړی مقام خپل کړ. دا بریا د دوو کلونو هڅو، د تعلیمي کیفیت لوړولو او د ایران له سفارت سره د فارسي ژبې د زدهکړې د کورسونو په پیلولو کې د اغېزشیندونکی ملګرتیا پایله ده.
د ژبې او کلتوري ډیپلوماسۍ په پراختیا کې د جامعة المصطفى رول
د فارسي ژبې او ادب د فرهنگستان مشر حداد عادل، وویل: جامعة المصطفى د حوزو په نړیوال اړخ کې یو مهم بدلون دی، چې له درې لکو( ۳۰۰،۰۰۰ )څخه زیات غیر ایراني وګړي ئې د فارسي له کلتور او ادب سره بلد کړي دي. هغه زیاته کړه: د المصطفى لخوا جوړ شويد فارسي ژبې د زدهکړې ۱۹۰۰ کورسونه د ایران د نورو هیڅ یوه د ژبې او ادب زدهکړې بنسټ سره پرتله نه شي کیدای.
جامعة المصطفى العالميه نن سبا د ایران د علمي او کلتوري ډیپلوماسۍ د نښې په توګه، د تعلیم او څېړنې په برخې کې د نړیوالو تعاملاتو یو بریالی ماډل او سمبول ګڼل کیږي.
https://parstoday.ir/fa/iran-i20602
