په روسیې کې د ساراتوف جامع جومات د ۱۹۰ کلن ميراث درناوی وشو
ایکنا نیوز د muslimsaroundtheworld له قوله رآپور راکړ، د روسيې د ساراتوف ښار د جامع جومات د جوړېدو د ۱۹۰ کلنې کليزې په مناسبت، دا کلتوري غونډه د نومبر په ۸مه، (یعني د لړم ۱۸مه) نیټه د دغه جومات په اصلي تالار کې د ديني او فرهنګي شخصيتونو په ګډون سره جوړه شوه.
د «النهضه» ټولنيزې مؤسسې مشر رستم عبدالمانوف، په خپلو خبرو کې د ساراتوف جامع جومات تاريخ، د اسلامي ژوند د ودې پړاوونه له اوولسمې پېړۍ څخه راپه دې خوا، او د مسلمانانو هغه چورلیزي رول تشريح کړ چې د ساراتوف د فرهنګي او ټولنيز هويت په جوړښت کې ئې ادا کړی دی.
دغه علمي او کلتوري سمینار د ګډونوالو د ازادو خبرو اترو او د بېلابېلو طرحو او نظرونو له وړاندې کولو سره مل و، د دې لپاره چې د ۱۹۰ کلنۍ رسمي لمانځغونډې ته چې په ۲۰۲۶ کال کې ترسره کېږي، پوره چمتووالی ونيول شي. دا کار د سيمې د مسلمانانو د اسلامي ميراث د ساتنې په لور د هغوی د لا زياتې ميني څرګندونه کوي.
ويل کېږي چې د ساراتوف تاريخي جومات په ۱۸۳۲ کال کې په تاتار کوڅې سيمې کې جوړ شو، چې يو لوړ منار او د ځانګړي اسلامي سبک او سټایل ديوالونه ئې لرل.
خو د شوروي اتحاد په پړاؤ کې دا جومات ملي شو، مینار او ديوالونه ئې ونړول شول، او ودانۍ د نورو موخو لپاره وکارول شوه.
د شوروي اتحاد له ړنګېدو وروسته، مسلمانانو په ۱۹۹۱ کال کې دا ودانۍ بېرته ترلاسه کړه، خو د زړېدو له امله پرېکړه وشوه چې دا ورانه شي او پر ځای ئې يو نوی جومات جوړ شي.
د نوي جومات د ودانۍ کار په ۱۹۹۵ کال کې د نوې طرحې او په لویه ساحه کې پيل شو، او دا جومات په رسمي توګه د ۲۰۰۵ کال د سپتمبر په ۲۱ د ساراتوف د مسلمانانو د مذهبي او فرهنګي مرکز په توګه پرانيستل شو.
https://iqna.ir/fa/news/4315947/
