د امام علي(ع) په سپېڅلي حرم کې د نهجالبلاغې د نفيسې نسخې ليکل پيل شول
د ایکنا د راپور له مخې، چې د حسيني آستان د وېبپاڼې له قوله خپور شوی راغلی دي، د علوي آستان د فکري او فرهنګي چارو څانګې د علوي سپېڅلي آستان د متولي سيد عيسى الخرسان، تر مستقيمې څارنې لاندې د نهجالبلاغې د يوې نفيسې او ګرانبيّه نسخې د ليکلو پروژه پيل کړې ده.
د فکري او فرهنګي چارو د څانګې مشر کرار جاسب د علوي آستان له خبري مرکز سره په خبرو کې وويل؛زمونږ څانګې د نهجالبلاغې د يوې ارزښتناکې نسخې د کتابت پروژه پيل کړې ده. نهجالبلاغه هغه ستر اثر دی چې د اميرالمؤمنين حضرت علي(ع) ويناوې، ليکونه او حکمتونه پکې ټول شوي دي. دا پروژه د هغو ځانګړو اثارو او خپرونو له لړۍ څخه ده چې هنري اصالت د اوسمهاله مخاطب له اړتياوو او ذوق سره يو ځای کوي.
هغه زياته کړې چې دا نوې نسخه يوه ځانګړې او بېسارې پروژه ده چې تر اوسه د نظم، دقت او پاملرنې له دې کچې سره نه ده عملي شوې.
نوموړي يادونه وکړه چې علوي آستان په تېرو کلونو کې د نهجالبلاغې په اړه ګڼ خدمتونه کړي دي، چې پکې تاليف، څېړنه او د تخصصي فهرستونو برابرول شامل دي.
هغه ټينګار وکړ چې د دې پروژې موخه د داسې يوې نفيسې او ویاړمنې نسخې وړاندې کول دي چې له يوې خوا د اوسمهال نسل له ذوق سره سمون ولري او له بلې خوا د اسلامي ميراث اصالت هم وساتي.
د هغه په وينا، دا لومړنۍ نسخه ده چې د علوي آستان په مستقيم نظارت او پاملرنې چمتو کېږي.
د آستان خطاط حازم الحلو وويل:«په دې پروژه کې به د ګنجينه اي او نفيسو نسخو د ليکلو دوديزې او اصيلې طريقې وکارول شي. کاغذ، رنګ، قلم او سينګاري توکي به ټول له ځانګړو طبيعي موادو څخه غوره کېږي، څو د قرآن کريم د کتابت او نورو نفيسو آثارو له اصيلو خطاطۍ مکتبونو سره بشپړ همغږي ولري.
د درو ټوکونو ليکل؛
حازم الحلو څرګنده کړه چې د دې پروژې بشپړېدل به شاوخوا يو کال وخت ونيسي او د علوي آستان يو شمېر مخکښ خطاطان به پکې برخه واخلي.
هغه وويل چې دا اثر به په درو ټوکو کې ترتيب شي، لکه څنګه چې پخوانۍ او اصيلې نسخې د معتبرو خطاطۍ مکتبونو پر بنسټ ليکل کېدې.
هغه زياته کړه چې د دې نسخې هره پاڼه به ۱۴ کرښې ولري. دا شمېر د څوارلسو معصومينو (عليهم السلام) د نومونو د تبرک او درناوي په نيت ټاکل شوی دی.
نهجالبلاغه د اسلامي ميراث له مهمو فکري، ادبي او معرفتي سرچينو څخه شمېرل کېږي او د اميرالمؤمنين حضرت علي(ع) خطبې، ليکونه او حکمتونه پکې ټول شوي دي. له همدې امله، د دې نفيسې نسخې د ليکلو پروژه، چې د علوي سپېڅلي آستان له لوري ملاتړ کېږي، ځانګړی فرهنګي او علمي ارزښت لري.
https://iqna.ir/fa/news/4357862
