د اربعین زائرانو د کربلا د «الکفیل» میوزیم تود هرکلی وکړ
د ایکنا د راپور له مخې، چې د الکفیل وېبپاڼې په حواله خپور شوی راغلي دي، د حضرت ابوالفضل العباس (ع) د سپېڅلي آستان د خزانو او خطي نسخو د څانګې مشر نافع الموسوي وویل:«دغه میوزیم د صفرې میاشتې له لومړۍ نېټې څخه تر شلمې پورې د ۱۰۶ زره لیدونکو کوربه و. دا هغه موده وه چې د امام حسین (ع) د حسینی اربعین د مراسمو د لمانځنې لپاره د کربلا سپېڅلي ښار ته د زائرانو د ورتګ تر ټولو لوړه کچه ثبت شوې وه.»
هغه زیاته کړه چې د لیدونکو د شمېرلو بهیر د هغو کیمرو له لارې ترسره شوی چې د میوزیم د نندارتون د تالار په ورودئ کې لګول شوې دي. دغه کیمرې د لیدنې په ټولې مودې کې د ګډونوالو شمېر څاري او په دقیق ډول ئې ثبتوي، چې له دې لارې د لیدونکو د شمېر په اړه مستند او کره احصایې ترلاسه کېږي.
الموسوي څرګنده کړه چې د میوزیم د نندارتون په تالار کې د لیدونکو پراخ شتون دا ښئي چې خلک د تاریخي آثارو او د میوزیم له ارزښتناکو خزانو سره د بلدتیا او د هغوی د تاریخي او فرهنګي ارزښت د درک کولو ځانګړې لېوالتیا لري.
د حضرت عباس علمدار (ع) سپېڅلي آستان د ۱۴۳۱ هجري قمري کال د جمادي الاولې میاشتې په پنځلسمه نېټه، چې له ۲۰۰۹ میلادي کال او د حضرت زینب کبری (س) د مبارکې زوکړې له کلیزې سره برابره وه، د میوزیمي آثارو د نندارې د یوه ځانګړي تالار په پرانیستلو سره د خپل میوزیم د بنسټ اېښودلو لومړی ګام پورته کړ.
وروسته، په ۲۰۱۴ میلادي کال کې د نفیسو آثارو او خطي نسخو میوزیم په رسمي توګه جوړ شو.
دا میوزیم ګڼې څانګې او برخې لري، چې له هغو څخه د میوزیم دفتر، خزانه، د اسنادو څانګه، آرشیف، د نندارتون تالار، لابراتوار او د میوزیم د رسنیو څانګه د یادونې وړ دي.
د حضرت عباس علمدار(ع) د سپېڅلي آستان اړوند د الکفیل د خزانو او خطي نسخو میوزیم ټینګار کوي چې اسلامي هنرونه د فرهنګي هویت د ساتنې یوه ژوندۍ حافظه او د تاریخ، لرغونپوهنې، فرهنګي میراث او میوزیمدارۍ په برخو کې د پوهنتوني څېړنو لپاره یوه باوري علمي سرچینه ده.
https://iqna.ir/fa/news/4368175
