Maombi ya wale waliosikia wito wa Imani

TEHRAN (IQNA) – Mwito unapowaalika watu kumwamini Mwenyezi Mungu, wapo wanaofuata wito na kunakuwa na umoja miongoni mwa wanaoukubali wito huu.

Baadhi ya aya za Qur'ani Tukufu zinahusu maombi ya manabii na watu wema ambayo huanza na maneno Rabbana (Mola wetu) na kueleza maombi ya waja kwa Mwenyezi Mungu.

Moja ya mistari hii inahusu wale ambao wamesikia ujumbe wa imani na kuuamini. Usikilizaji ni mojawapo ya njia bora za mwongozo, huku baadhi ya wafasiri wa Qur'an wakiielezea kuwa njia bora zaidi.

Aya ni hii: “ Mola wetu Mlezi! Hakika sisi tumemsikia mwenye kuita akiitia Imani kwamba: Muaminini Mola wenu Mlezi; nasi tukaamini. Basi tusamehe madhambi yetu, na utufutie makosa yetu, na utufishe pamoja na watu wema.” (Surah Al Imran, Aya ya 193)

Wafasiri wa Qur'ani Tukufu wametaja baadhi ya nukta kuhusu mwitaji wa imani ni nani:

• Wengi wao wanaamini kuwa Mtukufu Mtume Muhammad (SAW) ndiye aliyelingania kwenye imani.
• Wengine wanasema ni Qur'ani Tukufu, kwa sababu watu wengi hawajasikia wito wa Mtume (SAW) ana kwa ana lakini kila mtu amesikia wito wa Qur'ani Tukufu.

Tunasoma katika Tafsiri ya Nemuneh ya Qur'ani Tukufu: Wale wanaomiliki hekima na busara, baada ya kutambua lengo la uumbaji, watatambua pia ukweli kwamba njia hii ambayo ina panda shuka nyingi haiwezi kuchukuliwa bila kiongozi. Kwa hiyo daima wanangojea sauti ya wale wanaoita kwenye imani. Wanawasikia, wanawaendea upesi na kuamini kwa moyo wao wote na kumwambia Mola wao: “Bwana, tumemsikia yule anayeita kwenye imani na tumekubali mwito wake.”

Bila shaka wapo wanaopuuza wito huu na hao ndio wanaosema kwa majuto Siku ya Kiyama: “Na watasema: Lau kuwa tungeli sikia, au tungeli kuwa na akili, tusingeli kuwa katika watu wa Motoni!” (Surah Al-Mulk, Aya ya 10)

Ujumbe wa Aya ya 193 ya Surah Al Imran Kwa mujibu wa Tafsiri ya Noor ya Qur'an Tukufu:

• Watu wenye hekima wako tayari kuukubali ukweli na pamoja na kuitikia wito wa Fitra (maumbile), wanaitikia wito wa Mitume, wanachuoni na mashahidi: “Mola wetu, tumemsikia mwitaji akilingania…”
• Kutubia na kukiri kosa ni dalili za hekima.
• Miongoni mwa adabu za kuomba zinazofungua njia ya msamaha wa Mwenyezi Mungu ni kuzingatia sifa ya Mwenyezi Mungu ya kudumisha na kusamehe. “Mola wetu! basi utusamehe makosa yetu.”
• Imani ni msingi wa kupokea msamaha wa Mungu.
• Tujumuishe wengine katika maombi yetu.
• Kuweka siri ni miongoni mwa mambo ya Rububiyat na njia ya elimu.
• Kifo cha watu hutokea sawasawa na Mapenzi ya Mungu. “… tupeleke Kwako katika mauti pamoja na watu wema.”
• Watu wenye hekima na busara wanatamani mauti pamoja na watu wema. “… tupeleke Kwako katika mauti pamoja na watu wema.”
• Watu wema wana hadhi ambayo watu wote wenye hekima wanataka kufikia hadhi hiyo. "... tupeleke Kwako katika mauti pamoja na watu wema."