Nakala za Qur'ani za Nukta Nundu (Braille) zasambazwa katika Maonesho ya Vitabu ya Cairo

IQNA – Nakala za Qur'ani zilizoandikwa kwa mfumo wa nukta nundu (Braille) zinasambazwa kwa wageni wanaotembelea Maonesho ya 57 ya Kimataifa ya Vitabu ya Cairo mwaka 2026.

Kulingana na taarifa za tovuti ya Youm7, banda la Wizara ya Mambo ya Kiislamu, Daawa na Mwongozo ya Saudi Arabia limekuwa likigawa nakala hizo kwa wageni.

Katika toleo hili la maonesho, banda hilo limeonyesha machapisho ya Kituo cha Uchapishaji Qur'ani cha Mfalme Fahd, pamoja na kusambaza Mus’haf Al-Madinat al-Nabi kwa maandishi ya Braille kwa ajili ya watu wenye uoni hafifu.

Nakala hii ya Braille ni miongoni mwa kazi zilizochapishwa na Kituo cha Uchapishaji Qurani cha Mfalme Fahd.

Mus’haf huo umetengenezwa kwa mfumo wa nukta zilizoinuka ili kuwawezesha wasioona kusoma aya za Qurani kwa kugusa.

Qurani hii imekuwa nyenzo muhimu kwa watu wenye uoni hafifu, ikiwapa uwezo wa kusoma na kurudia Qur'ani Tukufu kwa njia sahihi na inayokubalika.

Aidha, banda hilo limechangia nakala 50,000 za Qurani katika ukubwa mbalimbali kwa wageni wa maonesho hayo.

Habari inayohusiana:

• Iran kusambaza nakala 3,000 za Qurani za Braille kwa wenye ulemavu wa macho

Maonesho ya 57 ya Kimataifa ya Vitabu ya Cairo yalianza Januari 23, 2026, katika Kituo cha Kimataifa cha Maonesho cha Misri, na yataendelea hadi Februari 3, 2026.

Kaulimbiu ya toleo hili ni: “Atakayekoma kusoma kwa saa moja, ataachwa nyuma kwa karne nyingi.” Maonesho haya yamevutia vituo 1,457 vya uchapishaji kutoka nchi 83.

4330795