تیرہ رجب یوم ولادت با سعادت فاتح خیبر، شیر خدا، باب العلم ، حضرت علی المرتضیٰ علیہ السلام۔ قارئین کو مبارک ہو

پروردئہ رسولؐ، اقلیم ولایت کے شہنشاہ، عبادت و ریاضت میں مسلمانوں کے پیشواء، ہمت وشجاعت کے عظیم پیکر معرکۂ خیبر کے شاہ سوار حضرت علی علیہ السلام، جن کی شان یہ ہے کہ ولادت ’’کعبہ‘‘ میں ہوئی اور شہادت ’’مسجد‘‘ میں

ایکنا نیوز-  علی المرتضیٰ (ع)جن کی زندگی کا محور آغاز سے انجام تک اللہ تعالیٰ کا گھر تھا۔ آپ ’’ نجیب الطرفین ہاشمی‘‘ اور نبی اکرمؐ کے سگے چچا زاد بھائی ہیں۔ آپ کی کنیت ’’ابوالحسن اور ابو تراب‘‘ ہے۔
امیرالمؤمنین حضرت علی (ع) کی جملہ خصوصیات میں ایک عظیم خصوصیت یہ بھی ہے کہ آپ نبی اکرمؐ کے سگے چچا زاد بھائی ہونے کے علاوہ ’’عقد مواخاۃ‘‘ میں بھی آپؐ کے ’’بھائی‘‘ ہیں۔ چناں چہ جامع ترمذی میں حضرت عبداللہ بن عمر بیان کرتے ہیں کہ جب اللہ کے پیارے رسول حضور خاتم الانبیاءﷺ نے صحابۂ کرامؓ کے درمیان ’’عقد مواخاۃ‘‘ (بھائی چارہ) قائم فرمایا اور ایک صحابی کو دوسرے صحابی کا دینی و اسلامی بھائی بنا دیا تو حضرت علی (ع) نہایت آب دیدہ ہوکر بارگاہِ رسالت مآبؐ میں حاضر ہوئے اور عرض کیا یارسول اللہﷺ آپ نے ’’عقد مواخاۃ‘‘ میں تمام صحابۂ کرام کو تو ایک دوسرے کا بھائی بنا دیا ہے لیکن مجھے کسی کا بھائی نہیں بنایا، میں تو یوں ہی رہ گیا ہوں۔ رسول اکرمؐ نے نہایت پیار اور محبت کے انداز میں فرمایا: ’’اے علی (ع)! تم دنیا و آخرت دونوں میں میرے بھائی ہو۔‘‘ (جامع ترمذی، مشکوٰۃ المصابیح ))

مقام ِعلم و فضل
علی المرتضیٰ (ع) جنکا دعوی سلونی زبان ذد خاص و عام ہے ۔ حضور سرکاردوعالمؐ کی جوہر شناس نگاہوں نے حضرت علی (ع) کی اس خداداد قابلیت و استعداد کا پہلے ہی اندازہ کر لیا تھا اور آپؐ کی زبانِ فیضِ ترجمان سے حضرت علی (ع) کو ’’بابِ مدینۃ العلم‘‘ (یعنی جملہ علم و حکمت کے شہر کا دروازہ) کی سند مل چکی تھی چناںچہ حضرت علی (ع) کے مقام علم و فضل کے متعلق حضور امام الانبیاء حضرت محمد مصطفیﷺ فرماتے ہیں کہ: ’’ میں جملہ علم و حکمت کا شہر ہوں اور حضرت علی (ع) اس علم و حکمت کے شہر کا مرکزی دروازہ ہیں۔‘‘ (جامع ترمذی، ابن عساکر، مشکوٰۃ المصابیح))
جاں نثاری وامانت داری
حضور سید عالمؐ نے جب اللہ تعالیٰ کے حکم کے مطابق مکۂ مکرمہ سے مدینہ منورہ کی طرف ہجرت کرنے کا ارادہ فرمایا تو آپؐ نے حضرت علی (ع) کو بلا کر فرمایا: ’’مجھے اللہ تعالیٰ کی طرف سے ہجرت مدینے کا حکم ہو چکا ہے، اور میں آج ہی مدینہ طیبہ روانہ ہو جاؤں گا، لہٰذا تم میرے بستر پر میری سبز رنگ کی چادر اوڑھ کر سو جانا اور صبح قریش مکہ کی ساری امانتیں اور وصیتیں جو میرے پاس رکھی ہوئی ہیں، وہ ان کے مالکوں کے سپرد کر کے تم بھی مدینہ منورہ چلے آنا۔ چناں چہ حضرت علی (ع) بغیر کسی خوف و خطر کے حضور اقدسؐ کے بستر مبارک پر سو گئے۔ صبح ہوئی تو کفارِ مکہ جو رات بھر ناپاک و نامراد ارادے کے ساتھ کاشانۂ نبویؐ کا بہت سخت محاصرہ کیے ہوئے تھے، برہنہ تلواریں لے کر کاشانۂ مصطفویؐ میں داخل ہوگئے لیکن یہاں آکر دیکھا کہ بستر نبویؐ پر حضوراکرمؐ کے بجائے آپ کا ایک جاں نثار موت و حیات سے بے پروا ہوکر سو رہا ہے۔ کفار مکہ یوں ہی ناکام و نامراد ہوکر واپس چلے گئے۔
حضرت علی المرتضیٰ (ع) فرماتے ہیں کہ میں رات بھر آرام و سکون کے ساتھ سویا اور صبح اٹھ کر لوگوں کی امانتیں اور وصیتیں ان کے مالکوں کے حوالے کر دیں۔ امانتوں کی ادائیگی کی وجہ سے میں تین دن مکۂ معظمہ میں رہا اور پھر میں نے بھی مدینۂ منورہ کی طرف ہجرت کر لی۔ آپ فرماتے ہیں کہ موت برحق ہے لیکن آج کی رات مجھے موت نہیں آسکتی کیوںکہ سرکار دو عالمؐ نے فرمایا کہ علی تم یہ امانتیں ان کو مالکوں کو دے کر پھر مدینہ کی طرف ہجرت کرنا اور جب تک یہ امانتیں سپرد نہیں ہو جاتیں اور جب تک میں مدینہ ہجرت نہیں کر لیتا اس وقت موت نہیں آسکتی کیوں کہ یہ سرکار دو عالمؐ کا فرمان تھا۔
حضور نبی اکرمؐ کی حسنِ کفالت
حضرت علی المرتضیٰ (ع)، حضور سید عالمؐ کی بعثت سے دس سال پہلے پیدا ہوئے۔ ابو طالب چوں کہ کثیرالعیال اور مالی و معاشی تنگی سے نہایت پریشان تھے، اس لیے حضور رحمت دو عالمﷺ نے اپنے محبوب چچا کی تنگ دستی اور مفلسی سے متاثر ہوکر حضرت عباس سے فرمایا کہ ہمیں اس مصیبت و پریشاں حالی میں چچا کا ہاتھ بٹانا چاہئے۔ چناں چہ حضرت عباس نے حسب ارشادِ نبویؐ حضرت جعفر طیار کی کفالت کی ذمے داری لی اور خود حضور سید الکونینؐ کی نگاہِ انتخاب نے حضرت علی (ع) کو پسند فرمایا۔ چناں چہ آغازِ طفولیت ہی سے حضرت علی مرتضیٰ (ع) آفتاب نبوت و رسالت حضور خاتم الانبیاءؐ کی حسن تربیت اور آغوشِ پرورش میں رہے۔ حضرت علی (ع) نے ایام ِطفولیت ہی سے حضور سرور ِدو عالمؐ کے دامن رحمت و عاطفت میں تربیت پائی تھی، اس لیے آپ قدرتاً محاسنِ اخلاق اور حسن تربیت کے بہترین نمونہ تھے۔
حضرت علی کو بچپن ہی سے درس گاہِ نبوت میں تعلیم و تربیت حاصل کرنے کا زریں اور پر تقدس موقع ملا، جس کا سلسلہ ہمیشہ قائم و دائم رہا۔ مسند امام احمد میں آپ (ع) اس پر فخر و ناز کرتے ہوئے فرماتے ہیں کہ: ’’ میں روزانہ صبح کو معمولاً آپؐ کی خدمت اقدس میں حاضر ہوا کرتا تھا اور تقرب کا یہ درجہ میرے علاوہ کسی کو حاصل نہ تھا۔ چناں چہ اسی وجہ سے آپ کو حضوراکرمؐ کے تحریری کام کرنے کی سعادت بھی حاصل تھی۔ کاتبانِ وحی میں آپ کا اسم گرامی بھی سرفہرست نظر آتا ہے۔ آں حضرتؐ کی طرف سے جو فرامین و مکاتیب لکھے جاتے تھے، ان میں بعض آپ کے دست مبارک کے لکھے ہوئے تھے، چناں چہ ’’صلح حدیبیہ‘‘ کا صلح نامہ آپ نے ہی لکھا تھا۔
ہمت و شجاعت کے پیکر
شاہِ خیبر شکن امیرالمومنین حضرت علی المرتضیٰ (ع) کی بے مثال ہمت و شجاعت اور شہرئہ آفاق جرأت و بہادری کی لازوال داستانوں کے ساتھ سارے عرب و عجم میں آپ کی قوتِ بازو کے سکے بیٹھے ہوئے تھے۔ آپ کے رعب و دبدبے سے بڑے بڑے پہلوانوں کے دل کانپ جاتے تھے۔ جنگ ِتبوک کے موقع پر سرکار دو عالمؐ نے آپ کو مدینہ منورہ میں اپنا جانشین مقرر فرمایا تھا، اس لیے اس غزوہ میں آپ شریک نہ ہو سکے، اس کے علاوہ باقی تمام غزوات و سرایا میں آپ شریک ہوئے اور بڑی جاں بازی کے ساتھ کفار و مشرکین کا مقابلہ کیا اور بڑے بڑے بہادروں اور شہسواروں کو اپنی مایۂ ناز اور شہرئہ آفاق ’’ ذوالفقارِ حیدری‘‘ سے موت کے گھاٹ اتارا۔
وصال با کمال : بالآخر اسلام کی خاطر اپنی جان بھی قربان کر دی۔ حضرت علی المرتضیٰ (ع) 21 رمضان المبارک بروز جمعتہ المبارک 40 ہجری کو فجر کی نماز میں عین حالت سجدہ میں شہادت کے عظیم منصب و مرتبے پر فائز ہوئے۔

شاہ مرداں شیریزداں قوت پروردگار

 لا فتی الا علی لا سیف الا زوالفقار