’اگر پاکستانی طالبان، افغان طالبان کے سربراہ کو مانتے ہیں تو ان کی بات بھی ماننا ہوگی‘

افغان طالبان کے ترجمان ذبیح اللہ مجاہد کا کہنا ہے کہ افغان طالبان کے سربراہ بار بار واضح کرچکے ہیں کہ افغان سر زمین کسی کے خلاف استعمال نہیں ہوگی۔

جیو نیوز کے سینیئر صحافی سلیم صافی سے خصوصی گفتگو میں ذبیح اللہ مجاہد نے کہا کہ  اگر  پاکستانی طالبان، افغان طالبان کے سربراہ کو اپنا سربراہ مانتے ہیں تو انہیں ان کی بات بھی ماننا ہوگی۔

جیو نیوز کے پروگرام ’جرگہ‘ میں سلیم صافی سے گفتگو میں انہوں نے یہ بھی کہا کہ پاک افغان طویل سرحد پر بعض مقامات ایسے ہیں جہاں ابھی تک ان کی رسائی نہیں، حکومت کی تشکیل کے بعد اس سے متعلق مکینزم بنائیں گے۔

ذبیح اللہ مجاہد کا خصوصی انٹرویو  آج رات دس بج کر پانچ منٹ پر جیو نیوز پر نشر کیا جائے گا۔

افغانستان کی موجودہ صورتحال کا پس منظر

خیال رہے کہ گزشتہ دنوں طالبان نے کہا تھا کہ 31 اگست تک امریکا اور برطانیہ اپنا انخلا مکمل کریں اور اگر 31 اگست کے بعد بھی امریکی فوجی موجود رہتے ہیں تو اسے قبضے میں توسیع سمجھا جائے گا اور نتائج کے ذمہ دار وہ خود ہوں گے۔