ریڈیو قرآن مصر سے قاری نعینع کی تلاوت پر پابندی کی تردید

ایکنا: مصر کے شیخ القراء احمد نعینع نے بعض سوشل میڈیا پلیٹ فارمز پر گردش کرنے والی ان خبروں کی تردید کی ہے جن میں دعویٰ کیا گیا تھا کہ قاہرہ ریڈیو قرآن سے ان کی تلاوت کی نشریات معطل کر دی گئی ہیں۔

ایکنا نیوز-  التواصل نیوز کی رپورٹ کے مطابق شیخ احمد نعینع حسبِ معمول مصر کے ریڈیو قرآن میں اپنی باقاعدہ حاضری اور خدمات جاری رکھے ہوئے ہیں اور ان کی معطلی کے بارے میں پھیلائی جانے والی افواہیں بے بنیاد ہیں۔

بیان میں تمام سوشل میڈیا صارفین اور سامعین سے اپیل کی گئی ہے کہ کسی بھی خبر یا معلومات کو شیئر یا دوبارہ نشر کرنے سے قبل اس کی تصدیق ضرور کریں اور غیر مصدقہ اطلاعات اور افواہوں کے پھیلاؤ سے گریز کریں۔

مزید برآں، شیخ احمد نعینع کے پریس بیان میں درست معلومات کے حصول کے لیے سرکاری اور معتبر ذرائع سے رجوع کرنے کی اہمیت پر زور دیا گیا ہے۔

احمد نعینع نے اپنے تمام چاہنے والوں اور حامیوں کا شکریہ ادا کیا جنہوں نے اپنی محبت، تشویش، فون کالز اور حمایتی پیغامات کے ذریعے ان سے اظہارِ یکجہتی کیا۔ انہوں نے اللہ تعالیٰ سے دعا کی کہ وہ سب کو اپنی حفظ و امان میں رکھے اور انہیں دائمی صحت و تندرستی عطا فرمائے۔

انہوں نے یہ بھی دعا کی کہ اللہ تعالیٰ تمام انسانوں کو خیر و بھلائی کی راہ دکھائے اور مصر اور اس کے عوام کو ہر قسم کے نقصان اور آفات سے محفوظ رکھے۔

شیخ احمد نعینع مصر کے اُن نامور قراء میں شمار ہوتے ہیں جو پیشے کے اعتبار سے ڈاکٹر بھی ہیں۔ وہ 1954ء میں مصر کے صوبہ کفر الشیخ کے شہر مطوبس میں پیدا ہوئے۔ آٹھ سال کی عمر سے قبل ہی انہوں نے پورا قرآن حفظ کر لیا تھا۔ انہوں نے اپنی ابتدائی اور متوسط تعلیم صوبہ بحیرہ میں حاصل کی، بعد ازاں اسکندریہ یونیورسٹی میں طب کی تعلیم حاصل کی اور اسی جامعہ کے اسپتال میں خدمات انجام دیں۔

گزشتہ سال مصر کے وزیر اوقاف، اسامہ الازہری نے نصف صدی سے زائد عرصے تک قرآنِ کریم کی خدمت کے اعتراف میں شیخ احمد نعینع کو "شیخ القراء مصر" مقرر کیا تھا۔/

4357132