نماز عید کے خطبوں میں فلسطین اور کشمیر سے اظہار یکجہتی

ملک بھر کے مختلف شہروں میں عید الفطر مذہبی عقیدت و احترام کے ساتھ منائی جا رہی ہے.

ایکنا نیوز کی رپورٹ کے مطابق عید فطر کے موقع پر پاکستان کے چھوٹے بڑے شہروں میں نماز عید کے ہزاروں اجتماعات منعقد ہوئے اور نماز عید کے بعد امت مسلمہ اور ملک کی سلامتی خوشحالی کے لیے دعائیں مانگی گئیں۔

کوئٹہ میں نماز عید مرکزی عید گاہ علمدار روڑ میں ادا کی گیی جہاں حجت الاسلام سید ہاشم موسوی نے تقوی پر تاکید کرتے ہوئے فلسطین اور کشمیری عوام سے یکجہتی پر تاکید کی۔ کوئٹہ  کے علاوہ آزاد کشمیر اور گلگت بلتستان کے ساتھ ساتھ مقبوضہ کشمیر میں بھی عید الفطر مذہبی جوش وجذبے کے ساتھ منائی جا رہی ہے۔

صدر مملکت عارف علوی نے اسلام آباد کی فیصل مسجد میں نماز عید ادا کی جبکہ وزیر اعظم شہباز شریف نے جاتی امرا لاہور میں عید کی نماز ادا کی، وزیراعلیٰ پنجاب حمزہ شہباز نے بھی ان کے ساتھ ہی نماز عید ادا کی۔

وزیراعظم اور وزیراعلیٰ پنجاب نے ملکی سلامتی اور استحکام کے لیے دعا کی، نماز عید کے بعد لوگوں سے گلے ملے اور عید کی مبارکباد دی۔

کراچی میں نماز عید کا سب سے بڑا سرکاری اجتماع پولو گراؤنڈ میں ہوا جس میں ایڈمنسٹریٹر کراچی مرتضیٰ وہاب، ایم کیوایم رہنما خالد مقبول صدیقی، عامر خان اور وسیم اختر سمیت مختلف اداروں کے سربراہان اور معززین نے نماز عید ادا کی۔

امیر جماعت اسلامی سراج الحق نے منصورہ لاہور میں نماز عید پڑھائی جبکہ وزیر دفاع خواجہ آصف نے سیالکوٹ، سابق وزیراعظم یوسف رضا گیلانی اور سابق وزیر خارجہ شاہ محمود قریشی نے ملتان میں نماز عید ادا کی۔

نماز عید کے اجتماعات میں پاکستان کی ترقی، سلامتی و خوشحالی اور امت مسلمہ کے اتحاد کی خصوصی دعائیں مانگی گئیں۔/