ترجمه قرآن اور اسلامی متون میں نو مسلم خاتون کی کاوش

ایکنا: نو مسلم خاتون نے قرآن کریم اور اسلامی متون کے ترجمے سے اسلامی تعلیمات کے لئے گرانقدر خدمات انجام دی۔

ایکنا نیوز کے مطابق، پیو ریسرچ سینٹر (Pew Research Center) کے ایک امریکی تھنک ٹینک کی تحقیق سے معلوم ہوا ہے کہ حالیہ سالوں میں امریکہ میں مسلمانوں کی تعداد مسلسل بڑھ رہی ہے، اور ہر سال تقریباً 100,000 افراد اس ملک میں مسلمانوں کی تعداد میں اضافہ کرتے ہیں۔
یہ تحقیق بتاتی ہے کہ نئے مسلمانوں کی بڑی تعداد ان لوگوں پر مشتمل ہے جو دیگر مذاہب سے اسلام قبول کرتے ہیں۔ ان میں سے زیادہ تر افراد مسیحی پس منظر سے تعلق رکھتے ہیں۔ جو افراد اسلام لائے، ان میں سے 53 فیصد پروٹیسٹنٹ تھے، 20 فیصد کاتھولک، اور تقریباً 19 فیصد نے کہا کہ اسلام قبول کرنے سے پہلے ان کا کوئی مذہب نہیں تھا۔

رپورٹ میں مزید کہا گیا ہے کہ جب نو مسلموں سے اسلام قبول کرنے کی وجوہات دریافت کی گئیں تو انہوں نے مختلف دلائل دیے۔ تقریباً ایک چوتھائی نے کہا کہ انہیں اسلام کی تعلیمات اپنے سابقہ مذہب کی تعلیمات سے بہتر لگیں، جبکہ 21 فیصد نے بتایا کہ انہوں نے اسلام قبول کرنے سے پہلے اس کے دینی متون کا مطالعہ کیا تھا۔ کچھ لوگوں نے مذہبی جماعت سے تعلق رکھنے کی خواہش کو اپنی تبدیلی کی وجہ بتایا، جبکہ دوسروں نے مسلمانوں سے شادی یا دوستوں کے ذریعے اسلام سے واقفیت کو اہم وجہ قرار دیا۔

امریکہ میں مشہور شخصیات، جن میں فنکار، کھلاڑی، مصنف، اور پروفیسر شامل ہیں، بھی اسلام قبول کر چکے ہیں۔ ان میں سے کئی افراد نے اسلامی تعلیمات اور خیالات کو امریکی معاشرے میں فروغ دینے میں اہم کردار ادا کیا ہے۔

ایسی ہی ایک نمایاں شخصیت عائشہ عبدالرحمن بیولی ہیں، جنہوں نے اسلامی متون کا انگریزی میں ترجمہ کیا۔ وہ 1948 میں امریکہ میں پیدا ہوئیں۔

وجود کی حقیقت کی تلاش

عائشہ بیولی کا خاندان مسیحی تھا، لیکن انہوں نے محسوس کیا کہ مسیحیت ان کی روحانی تسکین کے لیے کافی نہیں۔ انہوں نے کئی سالوں تک  بدھ مت کا مطالعہ کیا اور فلسفہ، نیطشے، شوپنہاؤر، کانٹ، اور ہیگل کے افکار کا مطالعہ کرتے ہوئے یہ سمجھنے کی کوشش کی کہ انسان کے وجود کا مقصد کیا ہے۔

اسلامی متون کا مطالعہ ان کے اسلام قبول کرنے کا سبب بنا، اور 1968 میں انہوں نے اسلام اختیار کر لیا۔ انہیں دنیا کی عارضی حقیقت اور مسیحیت و بدھ مت کے فلسفے غیر تسلی بخش لگے، جس کے بعد انہوں نے انگریزی زبان میں اسلامی روایات اور عقائد کو متعارف کرانے پر توجہ دی۔

بیولی کی خدمات برائے اسلامی متون کا ترجمہ

عائشہ بیولی نے اپنے شوہر کے تعاون سے اسلامی متون کے تراجم اور تصنیفات پر کام کیا۔ ان کی کل تصانیف اور تراجم کی تعداد 73 سے زائد ہے، جنہیں 172 بار اور تین زبانوں میں شائع کیا جا چکا ہے۔ ان کی زیادہ تر کتب دیوان پبلی کیشنز (Diwan Publications) کے تحت شائع ہوتی ہیں، جو کلاسیکی اور جدید اسلامی اور صوفی موضوعات پر کتابیں شائع کرتی ہے۔

طواسين منصور الحلاج، جو تصوف میں ایک پیچیدہ کتاب ہے، ان کا پہلا ترجمہ شدہ کام ہے۔

 

 

عائشہ عبدالرحمن بیولی نے اپنے شوہر کے تعاون سے 2009 میں قرآن کریم کا انگریزی ترجمہ مکمل کیا۔ یہ ترجمہ "The Noble Qurʼan: A New Rendering of Its Meaning in English" کے عنوان سے شائع ہوا، جسے انگریزی بولنے والے قارئین میں بے حد پذیرائی ملی۔ ناقدین نے اس ترجمے کو سابقہ ترجموں کے مقابلے میں زیادہ رواں، جدید اور قاری کی زبان سے قریب تر قرار دیا ہے۔ مزید برآں، اس ترجمے کی ایک اہم خوبی یہ بیان کی گئی ہے کہ اس میں قرآن کی آیات کا ادبی اور شعری لب و لہجہ محفوظ رکھا گیا ہے اور شیریں زبان میں اس کے مفہوم کو منتقل کیا گیا ہے۔

عائشہ عبدالرحمن بیولی، جو تین بچوں کی ماں ہیں، نے اپنے وقت کا بیشتر حصہ کلاسیکی اسلامی متون کے سب سے ضخیم اور مشکل تراجم کے لیے وقف کر دیا تاکہ اسلامی ثقافت کے خزانے کو دنیا بھر میں متعارف کرا سکیں۔ اردن کا رائل اسلامک اسٹریٹجک اسٹڈیز سینٹر (RISSC)، جو ہر سال دنیا کے 500 بااثر ترین مسلمانوں کی فہرست جاری کرتا ہے، نے 2023 میں انہیں سال کی بااثر ترین مسلمان خاتون کے طور پر منتخب کیا۔/

4250426