کربلاء میں «الکفیل» میوزیم میں زائرین کی دلچسپی
ایکنا نیوز- الکفیل ویب سائٹ کے مطابق حضرت عباسؑ کے روضۂ مبارک سے وابستہ الکفیل میوزیم برائے نوادرات و مخطوطات نے اعلان کیا ہے کہ اربعینِ امام حسینؑ کے ایام میں ایک لاکھ سے زائد افراد نے میوزیم کا دورہ کیا۔
آستانۂ مقدس عباسی کے شعبۂ نوادرات و مخطوطات کے سربراہ نافع الموسوی نے بتایا کہ یکم سے بیس صفر کے دوران، جب کربلائے مقدس میں اربعین کے موقع پر زائرین کی آمد اپنے عروج پر تھی، میوزیم میں ایک لاکھ 6 ہزار (106,000) افراد نے حاضری دی۔
انہوں نے کہا کہ زائرین کی تعداد کا اندراج نمائش ہال کے داخلی دروازے پر نصب جدید کیمروں کے ذریعے کیا گیا، جو آنے والے افراد کی تعداد کو مسلسل مانیٹر کرتے اور درست انداز میں ریکارڈ کرتے ہیں، جس سے مستند اعداد و شمار حاصل کرنا ممکن ہوتا ہے۔
نافع الموسوی کے مطابق، میوزیم کے نمائش ہال میں زائرین کی غیر معمولی دلچسپی اس بات کی عکاس ہے کہ لوگ تاریخی نوادرات، نایاب مخطوطات اور اسلامی ورثے سے آگاہی حاصل کرنے اور ان کی تاریخی و ثقافتی اہمیت کو سمجھنے میں گہری دلچسپی رکھتے ہیں۔
آستانۂ مقدس عباسی نے اپنے میوزیم کے قیام کی پہلی بنیاد 15 جمادی الاول 1431 ہجری (2009ء) کو حضرت زینب کبریٰؑ کے یومِ ولادت کی مناسبت سے آثارِ تاریخی کی نمائش کے لیے ایک خصوصی ہال کے افتتاح کے ذریعے رکھی۔
بعد ازاں 2014ء میں نوادر اور نایاب مخطوطات کے باقاعدہ میوزیم کا قیام عمل میں آیا۔ اس میوزیم میں متعدد شعبے اور یونٹس قائم ہیں، جن میں دفتر، خزانہ، دستاویزات، آرکائیو، میوزیم ہال، تجربہ گاہ (لیبارٹری) اور میڈیا یونٹ سمیت میوزیم سے متعلق چھ خصوصی شعبے شامل ہیں۔
الکفیل میوزیم، جو آستانۂ مقدس عباسی سے وابستہ ہے، اسلامی فنون کو ثقافتی شناخت کے تحفظ کی ایک اہم یادگار اور تاریخ، آثارِ قدیمہ، ثقافتی ورثے اور میوزیالوجی کے شعبوں میں علمی و تحقیقی مطالعات کے لیے ایک مستند ماخذ قرار دیتا ہے۔/
4368175
