قطر؛ تیسرے بین الاقوامی «ٹاپ ترین میں ٹاپ» قرانی مقابلوں کا آغاز
ایکنا نیوز کے مطابق یہ پروگرام شیخ جاسم بن محمد بن ثانی بین الاقوامی قرآن کریم مقابلے کے بین الاقوامی حصے کا ایک اہم جزو ہے۔
قطر کی وزارتِ اوقاف و امورِ اسلامی نے ایک بیان میں کہا ہے کہ یہ مقابلہ 30 جولائی 2026 تک جاری رہے گا، جس میں دنیا کے مختلف براعظموں کے 33 ممالک سے 82 ایسے شرکاء حصہ لیں گے، جو اس سے قبل بین الاقوامی قرآنی مقابلوں میں نمایاں پوزیشنیں حاصل کر چکے ہیں۔
وزارت نے واضح کیا کہ ابتدائی مرحلہ ویڈیو کانفرنس کے ذریعے وزارت کی عمارت میں قائم شیخ جاسم بن محمد بن ثانی قرآن کریم مقابلے کے مرکزی دفتر سے منعقد کیا جا رہا ہے۔
پانچ روزہ یہ مقابلہ اس بین الاقوامی قرآنی ایونٹ کے ممتاز مقام اور قرآنِ کریم کی خدمت، قرآنی سرگرمیوں کی سرپرستی اور دنیا بھر کے حفاظِ قرآن کی حوصلہ افزائی میں قطر کے قائدانہ کردار کی عکاسی کرتا ہے۔
"بہترینوں میں بہترین" مقابلہ اپنی نوعیت کے اعتبار سے منفرد ہے۔ اس میں صرف وہی افراد شرکت کے اہل ہیں جنہوں نے کسی بین الاقوامی یا معتبر قرآنی مقابلے میں پہلی پوزیشن حاصل کی ہو، یا وہ حفاظ جنہوں نے گزشتہ تین برسوں کے دوران شیخ جاسم بن محمد بن ثانی مقابلے کے حفظِ مکمل قرآن کے شعبے میں پہلی پوزیشن حاصل کی ہو۔
اس ایڈیشن میں ایسے حفاظِ قرآن شریک ہوں گے جو اس سے پہلے بڑے بین الاقوامی قرآنی مقابلوں میں اعلیٰ اعزازات حاصل کر چکے ہیں۔ یہ امر مقابلے کے بلند معیار کی عکاسی کرتا ہے اور "بہترینوں میں بہترین" کا خطاب ایک نہایت نمایاں عالمی قرآنی اعزاز بناتا ہے۔
یہ مقابلہ تین مسلسل مراحل پر مشتمل ہے۔ ابتدائی مرحلے میں 82 شرکاء شریک ہیں۔ دو خصوصی ججنگ کمیٹیاں شرکاء کا جائزہ لے کر 40 بہترین امیدواروں کا انتخاب کریں گی، جو دوسرے مرحلے میں رسائی حاصل کریں گے۔
دوسرا مرحلہ قطر میں امام محمد بن عبدالوہاب مسجد میں بالمشافہ منعقد ہوگا، جہاں شرکاء عوام اور بین الاقوامی ججوں کے سامنے مقابلہ کریں گے۔ یہ ججز اسلامی دنیا کے ممتاز ماہرینِ قراءت اور تجوید پر مشتمل ہوں گے۔
بین الاقوامی ججنگ کمیٹی دوسرے مرحلے سے 10 بہترین امیدواروں کا انتخاب کرے گی، جو فائنل مرحلے میں پہنچیں گے۔ آخری مرحلے میں شرکاء بالمشافہ مقابلہ کریں گے تاکہ "بہترینوں میں بہترین" کا اعزاز اور بین الاقوامی قرآن کریم مقابلوں کی تاریخ کا سب سے بڑا انعام، یعنی 10 لاکھ قطری ریال، حاصل کر سکیں۔
یہ مقابلہ ایک جامع اور علمی انداز میں منعقد کیا جا رہا ہے اور صرف حفظ، ترتیل اور تجویدِ قرآن تک محدود نہیں، بلکہ اس میں قرآنی الفاظ کے معانی کی یادداشت بھی شامل ہے، جس کے لیے کتاب "السراج فی بیان غریب القرآن: قرآن کے غیر معروف الفاظ کی وضاحت کے لیے ایک چراغ" کو بنیاد بنایا گیا ہے۔ یہ معیار ابتدائی، دوسرے اور حتمی تینوں مراحل میں نافذ ہوگا۔
4366415
