Mosulun şərqində küçəyə çıxma qadağası elan edildi
Beynəlxalq Quran Xəbər Agentliyi (İQNA) eastnews.org-a istinadla xəbər verir ki, İraq ordusuna bağlı 16-ci diviziyadan polkovnik-leytenant Sabah əl-Atvani Neynəva Əməliyyat Komandanlığının Mosulun şərqindəki bütün məhəllələrdə küçəyə çıxma qadağası elan etdiyini söyləyib.
Atvani qadağanın İŞİD-in şəhərin müxtəlif bölgələrində vətəndaşları və təhlükəsizlik qüvvələrini hədəfə alan hücumlarından sonra elan edildiyini və ikinci bir əmrə qədər davam edəcəyini dilə gətirib.
Atvani eləcə də Mosulun şimal-şərqindəki əl-Mühəndisin məhəlləsində kamikadzenin üzərindəki bombanı partladaraq, "Həşd Şabi" qüvvələrini hədəfə almağa çalışdığını, ancaq öldürüldüyünü, hadisədə 4 nəfərin də yaralandığını qeyd edib.
İraqda Mosulun İŞİD-dən azad edilən şərq hissəsində bir restoran və təhlükəsizlik məntəqəsinə təşkil edilən kamikadze hücumlarında 5 nəfərin öldüyü, 33 nəfərin yaralandığı bildirilmişdi.
