Hindistanda Salman Rüşdinin kitabına qoyulan qadağa ləğv edilib
"Euronews"-un verdiyi məlumata görə, Hindistan məhkəməsi, hökumətin əsas qərarı tapa bilmədiyi üçün yazıçı Salman Rüşdinin “Şeytan ayələri” romanına illərlə tətbiq edilən idxal qadağasını ləğv edib.
Qadağa, 2019-cu ildə Dehli Ali Məhkəməsində Dolayı Vergilər və Gömrük Mərkəzi Şurasına (CBIC) qarşı qaldırılan ərizənin mövzusu idi. Müraciət edən Sandipan Xan 1962-ci il Hindistan Gömrük Qanununa əsasən romanın idxalını qadağan edən CBIC-nin 1998-ci il bildirişinin küfr olduğunu əsas gətirərək konstitusiya etibarlılığına etiraz etdi.
Xanın ərizəsində qadağanın onun konstitusion ifadə və fikir azadlığı hüquqlarını pozduğu iddia edilib və ona romanı idxal etməyə icazə verilməsi tələb olunub.
Hüquqi sənədlərə görə, Xan kitabın idxalını qadağan edən bildirişin surətini istəyib, lakin sənədin tapılmaması barədə məlumat verilib.
Nəhayət, məhkəməyə hüquqi sənədlərə uyğun olaraq “bildirişin izlənilə bilmədiyi və buna görə də yerini tapmaq mümkün olmadığı” bildirilib.
Bu həftə məsələ ilə bağlı son dinləmədə Dehli Ali Məhkəməsi "belə bir bildirişin olmadığını güman etməkdən başqa çarəsi olmadığını" bildirdi.
“Buna görə də ərizəçinin sözügedən kitabla bağlı qanunda nəzərdə tutulmuş bütün tədbirləri görmək hüququ olacaq”, – qərar noyabrın 5-də dərc edilib.
Hindistan mətbuatında çıxan xəbərlərə görə, qərar Hindistana “Şeytan ayələri”nin idxalına icazə veriləcəyi anlamına gəlir.
İslamı və İslam Peyğəmbərini (s) təhqir edən bu romanı 1988-ci ildə qadağan edən ilk ölkə Hindistan olub. İmam Xomeyni (r.ə) kitabın müəllifi üçün ölüm fətvası verib.
Hindistanın Daxili İşlər Nazirliyi və Maliyyə Nazirliyi bu məsələdə səssiz qalıb.
“Şeytan ayələri” kitabının müəllifi Salman Rüşdi İmam Xomeyninin (r.ə) ölüm fətvasından sonra təxminən 30 il Britaniya hökumətinin himayəsi altında gizli həyat sürdü.
Hazırda Rüşdinin Amerika hökumətinin himayəsi altında yaşadığı bildirilir.
O, 2022-ci ilin yayında Nyu-Yorkun kənarında keçirilən ədəbi konfransda Livan əsilli gənc amerikalının hücumuna məruz qalıb, yaralanıb və bir gözünü itirib.
4247080
