Britaniyada ilk müsəlman daxili işlər naziri təyin olundu
“Əl-Cəzirə”nin xəbərinə görə, Şabana Mahmudun (Shabana Mahmood) təyinatı, baş nazir Keyr Starmer tərəfindən kabinetdə aparılan geniş dəyişikliklərin bir hissəsi olaraq, müavini Anjela Reynerin şəxsi evinə dair vergi qalmaqalı səbəbilə istefasından sonra həyata keçirilib.
Şabana Mahmud 17 sentyabr 1980-ci ildə anadan olub. O, Britaniyanın Birmingem şəhərində doğulub, böyüyüb və ailə kökləri Pakistanın Kəşmir bölgəsindəki Mirpur qəsəbəsinə gedib çıxır. O, Oksford Universitetinin Linkoln Hüquq Kollecini bitirib və orada tələbə komitələrindən birinin sədri olub. Mahmud peşə məsuliyyəti üzrə ixtisaslaşmış lisenziyalı vəkildir.
2010-cu ildə Britaniya İcmalar Palatasına keçirilən seçkilərdə Şabana Mahmud Birmingem–Ladyvud dairəsindən 10 min 105 səs toplayaraq deputat seçildi və Ruşanara Əli ilə Yasmin Qureyşidən sonra Britaniyanın ilk müsəlman qadın deputatları sırasında yer aldı.
O, Leyboristlər Partiyasının üzvüdür və ötən ilin iyulunda Britaniyada ədliyyə naziri postunu tutan ilk müsəlman qadın oldu.
Fələstin məsələsində Şabana Mahmud fələstinlilərin hüquqlarının müdafiəsini vacib sayır, eyni zamanda Britaniyanın İsraillə münasibətlərini qorumağın zəruriliyini vurğulayır.
Şabana fələstinlilərin hüquqlarını dəstəklədiyini dəfələrlə bəyan edib, lakin hesab edir ki, zorakı hərəkətlər Fələstin davasına xidmət etmir.
Keçən ilin iyulunda o, baş nazir Keyr Starmeri Fələstin dövlətini tanımağa çağırmışdı, çünki bu addımın İsrail rejiminə güclü mesaj göndərəcəyinə və sülh prosesini dəstəkləyəcəyinə inanırdı.
2014-cü ildə isə Şabana İsrailin qeyri-qanuni yaşayış məntəqələrinin məhsullarının satışına qarşı etiraz aksiyasında iştirak etmişdi ki, bu da bəzi yəhudi dairələrinin tənqidinə səbəb olmuşdu.
Aparılan sorğular göstərib ki, Birmingem Ladyvud seçki dairəsindəki bəzi seçicilər, xüsusən də onun Fələstin məsələsindəki mövqeyindən narahat olduqlarını bildiriblər ki, bu da gələcək seçkilərdə ona dəstəklərini təsirləndirə bilər.
Onun ilk müsəlman qadın daxili işlər naziri kimi təyin olunması hökumətdə müxtəlifliyin siyasi rəmzi hesab olunur və Starmer onu hüquqi tədbirlərlə insan haqlarının müdafiəsini birləşdirən həssas bir mövzunu idarə etmək üçün güclü və etibarlı fiqur kimi görür.
4303883
