Yapon şirkətindən səyyar məscid təşəbbüsü
“İQNA”-nın “Arab News”-a istinadən verdiyi xəbərə görə, müharibə, təbii fəlakətlər və ya əlverişsiz mühit səbəbindən məscidə çıxa bilməyən müsəlmanlar, tezliklə yapon şirkətinin bu təşəbbüsü sayəsində səyyar məscidlərdən istifadə edə biləcəklər.
Səyyar məscid — Yasu Project Co şirkəti tərəfindən hazırlanıb istehsal edilən unikal bir məhsuldur. Böyük yük maşınının yük platformasından namazxana kimi istifadə edilir.
Relive şirkətinin baş direktoru Sasaki Takaşi şirkətin hərəkəti asanlaşdırmaq üçün nəzərdə tutulmuş avadanlıqlar kolleksiyasına daxil olan köynəkləri və papaqları təqdim etdi. O bildirib ki, bu avadanlıqlar namaz vaxtı hərəkətlərin rahatlığı üçün çox uyğundur və nümayiş idman növlərindən gündəlik istifadəyə qədər müxtəlif sahələrdə tətbiq oluna bilər.
Yasu Project şirkətinin baş direktoru İnoue Yasuharu deyib ki, səyyar məscid ənənəvi namazxanalar mövcud olmayanda ibadət edənlər üçün sakit bir mühit təmin edir. Bu namazxanalardan fəlakət zamanı, tədbirlərin keçirildiyi məkanlarda və ya məscid olmayan bölgələrdə istifadə etmək mümkündür. O əlavə edib ki, səyyar məscid həm Yaponiyada, həm də beynəlxalq səviyyədə istifadə olunacaq.
Tokiodakı ərəb və müsəlman diplomatları səyyar məscidə müsbət reaksiya göstəriblər və bəziləri bunun öz ölkələrinin insanları üçün çox faydalı olacağını bildiriblər. Bu müsbət rəylər layihənin əhəmiyyətli təsir yarada biləcəyini göstərir.
Yaponiyada İslam səyyar namazxanalarının inşası və istismarı üçün bir fond yaradılıb. Səyyar Məscid Sülh Tərəfdaşlığı Layihəsi bu fondu, insanların dini və mədəni fərqlərdən kənara çıxaraq sülh içində yanaşı yaşaya biləcəyi bir cəmiyyətin qurulması məqsədilə təsis etdiyini açıqlayıb.
Fondun İslam dünyası ilə bağlı şirkətlərlə əməkdaşlıq etməsi və iqtisadi fəaliyyətlərindən əldə edilən mənfəətin bir hissəsini xeyriyyə işlərinə ayırması nəzərdə tutulur.
Bu səyyar məscid 48 kvadratmetrə qədər genişlənə bilir və eyni vaxtda 50 nəfəri qəbul edə bilir. Bundan əlavə, açıq havada su kranları və dəstəmaz üçün ayrıca yer də mövcuddur. Şirkət səyyar məscidin Yaxın Şərqə ixrac imkanlarını araşdırmaq üçün aidiyyəti qurumlarla əlaqə saxlayacağını bildirib.
4305681
