Hələbdə ilk sinaqoq və yəhudi məktəbinin yenidən açılışı!
“İQNA”-nın “Arabi21”-ə istinadən verdiyi xəbərə görə, Suriya İnsan Haqları Müşahidə Mərkəzi açıqlayıb ki, bir yəhudi təşkilatı Hələbin əl-Cəmiliyyə məhəlləsində onilliklərdir bağlı olan sinaqoq və yəhudi məktəbini ziyarət edib.
Bu ziyarət Suriyanın şimalında fəaliyyət göstərən bir assosiasiya tərəfindən təşkil olunan dini və mədəni tədbirin bir hissəsi olub və öncədən elan edilmədən İsraildən gələn iki ravvini də əhatə edib.
Suriya İnsan Haqları Müşahidə Mərkəzi sinaqoq və məktəbin ziyarətinə dair eksklüziv video da yayımlayıb.
Bu, Hələbdə son onilliklərdə baş verən ilk belə ziyarətdir və son aylarda sionist rejimin Suriya torpaqlarında həyata keçirdiyi misilsiz fəaliyyətlərin fonunda gerçəkləşib.
Müşahidə Mərkəzi qeyd edib ki, bu, son üç onillikdə ilk belə ziyarətdir və həmçinin əl-Cəmiliyyə və Bab ən-Nəsr məhəllələrindəki iki tarixi sinaqoqun da ziyarətini əhatə edib.
Müşahidə Mərkəzinin sənədləşdirdiyi məlumata görə, tədbirin təhlükəsizliyi ictimai təhlükəsizlik qüvvələri tərəfindən ciddi şəkildə təmin olunub, küçənin başından sonuna qədər möhkəm baryer qurulub və açılış zamanı heç kimin sinaqoqa yaxınlaşmasına icazə verilməyib.
Bu ziyarət Suriyadakı yəhudilərə məxsus əmlakların yoxlanılması məqsədi daşıyıb. Hesabatlara görə, Hələb valisi yəhudilərin əmlak dosyalarını qəbul etməyi, onların hüquqlarını əsas sahiblərinə qaytarmaq üçün çalışacağını və əvvəlki rejim dövründə bu əmlakları mənimsəmiş korrupsiya şəbəkələrini aradan qaldıracağını öhdəsinə götürüb.
Müşahidə Mərkəzinin mənbələri vurğulayıb ki, bu iki israilli ravvinin ziyarəti bir neçə həftə əvvəl Dəməşqdə baş vermiş oxşar fəaliyyətlərdən, o cümlədən yerli simalarla elan edilməmiş görüşlərdən sonra həyata keçirilib.
Bu hadisələr sionist rejimin Suriyada yumşaq güc kanalları yaratmaq üçün tədrici yanaşmasını göstərir və bu, cənub Suriyada davam edən bombardmanlar, hərbi hücumlar və işğallarla paralel şəkildə baş verir.
4322328
