İstiğfarın dünyəvi və axirət həyatında təsirləri
Qurani-Kərim və rəvayətlər baxımından istiğfar insanın maddi və mənəvi həyatında mühüm rol oynayır; istiğfar günahların təmizlənməsindən əlavə, şeytanı insandan uzaqlaşdırır, qəlbi cilalayır, elm nurunu qəlbdə parladır, qəm-qüssəni qəlbdən aparır, ruzini genişləndirir və bir sözlə, maddi və mənəvi fəsadların qarşısını alır, insana dünyəvi və axirət bərəkətləri bəxş edir.
Mənəviyyatın dünyəvi həyata təsirinə inanmaq, heç vaxt maddi səbəblərin rolunu zəiflətmək anlamında deyil; məqsəd budur ki, maddi amillərlə yanaşı, istiğfar kimi mənəvi amillər də təsir göstərir. Məsələn, Həzrət Saleh öz qövmünə dedi: “Nə üçün istiğfar etmirsiniz ki, rəhmətə nail olasınız?” (Nəml: 46). Həzrət Hud isə istiğfarın təsirlərindən birini dünyadan bəhrələnmək və “mətaən həsənən” – yəni ruhani sakitliklə müşayiət olunan xoş bir həyat – kimi izah edir.
İstiğfar hər fürsətdə, xüsusilə bərəkətli anlarda özünəməxsus təsirlərə malikdir. Bunun səbəbi odur ki, insanın əməlləri ilə həyat hadisələri arasında təbii bir bağlılıq mövcuddur. Yaradıcılıq sistemi ilahi iradəyə əsasən, hər bir əmələ uyğun münasib reaksiyalar göstərir və həmin əmələ uyğun nəticələri bu dünyada əməl sahibinə çatdırır.
Beləliklə, bəzi zikrlər və əməllər insanın həyatına çoxlu maddi və mənəvi bərəkətlərin enməsinə səbəb olur, bəzi söz və davranışlar isə bəlaların və müsibətlərin enməsinə gətirib çıxarır. Qurani-Kərim isə insanları bu əlaqələrdən daha üstün bir baxış bucağından baxmağa dəvət edir ki, xeyirli işlərə sarılmaq və şər əməllərdən uzaq durmaqla dünya və axirət səadətinə nail olsunlar.
3495243
