“Dövlət Tilavəti Səfiri”nin doğum gününün Misir Vəqflər Nazirliyi tərəfindən yad edilməsi
“İQNA”-nın “əl-Şuruq” xəbər portalına istinadən verdiyi məlumata görə, Şeyx Seyid Əbdiş-Şafi Hilal 29 may 1945-ci ildə Misirin Qalyubiyyə əyalətində, “Diminhur Şəbra əl-Xeymə” bölgəsində anadan olub və bəxşiş, dəvət və vəhy kəlamına xidmət ilə dolu bərəkətli bir Quran həyatı yaşayıb.
Şeyx Seyid Əbdiş-Şafi Hilal elmə və Qurani-Kərimə həvəsli bir ailədə böyüyüb, Uca Allahın kitabını gənc yaşlarında əzbərləyib və 12 yaşında tam hifzini başa vurub. Daha sonra təcvid və qirəət elmlərini bir sıra Quran alimlərinin yanında öyrənib. Onun ən görkəmli müəllimlərindən biri, onu şəri və Quran təhsilini tamamlamaq üçün Əzhərdəki Qirəət İnstituna daxil olmağa yönləndirən Şeyx Məhəmməd Əbdülğəni olub.
Onun tilavət istedadı uşaqlıqdan görünməyə başladı və 17 yaşından əvvəl dini mərasimlərin və Quran gecələrinin ihyasında iştirak edirdi. Beləliklə, onun şöhrəti qarilər və dinləyicilər arasında yayıldı. O, güclü səsi və təsirli ifası ilə fərqlənirdi ki, bu da onu böyük nəsil qarilər sırasına daxil etdi. Həmçinin, Misir daxilində və xaricində Qurani-Kərimi yaymaqda geniş səylərinə görə “Dövlət Tilavəti Səfiri” ləqəbini aldı.
Vəfat etmiş şeyx 1976-cı ildə - ifa və tilavətdə özünəməxsus müstəqil şəxsiyyət yaratdıqdan sonra - Misir Radiosunun imtahanlarını qazandı və təqlidsiz, özünəməxsus təsir bağışlamağa təkid edirdi. Bu da onu Quran tilavəti həvəskarları və dinləyiciləri arasında fərqli bir təsir sahibi etdi.
Şeyx Seyid Əbdiş-Şafi Hilal bir çox dünya ölkələrində Misirin nümayəndəsi olub. O, 20-dən çox ərəb, avropa, afrika və amerika ölkəsinə səfər edib və bir çox böyük İslam məclislərində Quran oxuyub. O, həmçinin ABŞ və İsveçrədə Quranı iki dəfə tam şəkildə səs yazısına alıb. Onun səsini dinləyərək Quran kəlamından təsirlənən bir sıra kişi və qadınlar müsəlman olublar.
O, həmçinin Ramazan gecələrini ihy etmək üçün Birləşmiş Ərəb Əmirliklərinin qonağı olub, bu ölkənin bir sıra böyük məscidlərində Quran oxuyub və müxtəlif Quran məclislərində geniş iştirak və böyük təsirə malik olub.
Şeyx Seyid Əbdiş-Şafi Hilal uzun illər Qalyubiyyə əyalətinin baş qarisi vəzifəsini daşıyıb, qarilərə yol göstərmək, onları doğru istiqamətləndirmək və tilavət qaydalarını mükəmməl mənimsəməyə diqqət yetirməklə tanınıb. O, 18 iyul 2013-cü ildə vəfatına qədər vəhy kəlamına xidmət missiyasını davam etdirib, Quran əhli və həvəskarları arasında ölməz bir Quran irsi və gözəl bir xatirə qoyub.
4354929
