Haaqa şəhərində Minab məktəbinə hücuma etiraz olaraq sükut yürüşü keçirilib

İQNA – Niderlandda yaşayan bir qrup iranlı, insan haqları təşkilatları və müxtəlif millətlərdən olan vətəndaşlarla birlikdə Hollandiyanın Haaqa şəhərində sükut yürüşü keçirərək İranda Minab ibtidai məktəbinə edilən ölümcül hücumu pisləyib və hadisənin qurbanlarını yad ediblər.

“İQNA”‑nın “əl‑Aləm” kanalına istinadən verdiyi xəbərə görə, tədbir ailələrin, uşaqların və vətəndaş fəallarının iştirakı ilə baş tutub. İştirakçılar məktəb çantaları daşımaqla hadisənin qurbanlarına həmrəylik nümayiş etdiriblər.

Təşkilatçılar bu aksiya ilə hadisənin məsullarını pisləməyi, qurbanların xatirəsini yaşatmağı və faciənin insani tərəflərinə beynəlxalq diqqət çəkməyi hədəflədiklərini bildiriblər.

Yürüş Haaqa şəhərinin “Lang Voorhout” bölgəsindən başlayıb, iştirakçılar “Tournooiveld” və “Lange Vijverberg” marşrutunu qət etdikdən sonra yenidən başlanğıc nöqtəsinə qayıdıblar. Marşrut boyunca sükut atmosferi və uşaqların geniş iştirakı tədbirə dərin emosional ab-hava qatıb.

Tədbirin diqqətçəkən məqamlarından biri yürüşün rəmzi şəkildə uşaqlar tərəfindən idarə olunması olub. Təşkilatçıların sözlərinə görə, bunun məqsədi gələcək nəsillərə həmrəylik, xatırlama və sosial məsuliyyət anlayışını öyrətməkdir.

Tədbirin sonunda iştirakçılar həlak olmuş şagirdlərin adlarını oxuyaraq onların xatirəsini yad ediblər və hadisənin araşdırılması, günahkarların cəzalandırılması və qurbanlar üçün ədalətin təmin olunmasını tələb ediblər.

4346908