Qüdsdə fransız rahibəyə hücum geniş ictimai qəzəbə səbəb olub
“İQNA”-nın “Əl-Cəzirə”-yə istinadən verdiyi xəbərə görə, Fransanın Qüds konsulluğu X sosial şəbəkəsində yayımladığı açıqlamada bildirib:
“Biz hücuma məruz qalan rahibənin tezliklə sağalmasını arzulayırıq və Fransa bu hücumun məsulunun məhkəməyə çıxarılmasını tələb edir.”
Fransa konsulluğunun bəyanatı, Qüdsdəki Fransız Müqəddəs Kitab və Arxeologiya İnstitutunun rəhbəri Ata Olivye Bukyonun X-də paylaşdığı və Qüdsdə fransız rahibəyə qarşı “əsassız və qəbuledilməz hücumu” pisləyən posta cavab olaraq yayımlanıb.
O, Frans Press agentliyinə bildirib ki, hücuma məruz qalan rahibə 48 yaşındadır və həmin fransız institutunda tədqiqatçı kimi çalışır, lakin bu hadisə barədə açıq danışmaq istəmir.
Ata Bukyon hücumun bəzi detalları barədə danışaraq deyib ki, rahibə arxadan kimsənin yaxınlaşdığını hiss edib və həmin şəxs onu güclə bir daşın üzərinə itələyib. O əlavə edib: “Rahibə yerə yıxılan kimi həmin kişi onu dəfələrlə təpikləməyə başlayıb.”
Fransız rahibəyə hücum anını göstərən sarsıdıcı video geniş qəzəb doğurub və sosial media istifadəçiləri bu vəhşi zorakılığı kəskin şəkildə pisləyiblər.
İsrail rejiminin Xarici İşlər Nazirliyi vəziyyəti nəzarət altına almaq cəhdində bu hücumu X-dəki səhifəsində pisləyərək onu “rüsvayçı əməl” adlandırıb və iddia edib ki, İsrail “bütün dinlər üçün din azadlığını və ibadət azadlığını qorumağa” sadiqdir.
Qüdsü işğal edən rejimin polisi isə açıqlayıb ki, Şərqi Qüdsdə rahibəyə qarşı irqi motivli hücumda şübhəli bilinən bir məskunlaşan saxlanılıb. Polis bildirib ki, hadisə ilə bağlı məlumat aldıqdan sonra “geniş axtarış aparılıb və şübhəli tapılaraq həbs edilib.”
4349666
