Hizbullahın şəhid döyüşçüsünün xanımı: Livan xalqı iman və ümidlə ayaq üstədir
"Əl-Kövsər" beynəlxalq kanalının media simalarından biri və Hizbullah döyüşçüsü şəhid Məhəmməd Baqir Əli Kərkinin həyat yoldaşı olan Houra Yasin, İQNA ilə söhbətində medianın ailənin möhkəmləndirilməsindəki rolu, şəhid ailəsində yaşamaq təcrübəsi, Livan xalqının sionist rejimin təcavüzü qarşısında dözümlülüyü və Livan cəmiyyətində müqavimətin yeri haqqında fikirlərini bölüşüb.
İQNA: "Əl-Kövsər" kanalında "Bir fincan qəhvə" proqramında ailə və cəmiyyət məsələlərinə toxunursunuz. Bölgənin çoxsaylı böhran və müharibələrlə üzləşdiyi bir şəraitdə, medianın ailələrdə ümidin və dayanıqlılığın qorunmasında hansı rolu var?
Media bu gün həyatımızın böyük bir hissəsini əhatə edib və demək olar ki, məlumat və xəbərlərə çıxışın əsas alətlərindən birinə çevrilib. Onun əhəmiyyətinə görə, düşmənlər media vasitəsilə müqavimətə dəstək verən mühitlərə zərbə vurmağa, onların ruhunu zəiflətməyə və aralarında tərəddüd yaratmağa çalışırlar.
Buna görə də, media fəaliyyətinin artırılmasına, onun səviyyəsinin yüksəldilməsinə və düzgün istiqamətləndirilməsinə diqqət yetirmək, müqavimət qüvvələri və xalq arasında həmrəyliyin möhkəmlənməsində mühüm rol oynaya bilər. Həmçinin, bu, həqiqəti aşkar edə və yalan rəvayətləri, eləcə də düşmən mediasını təsirsiz hala gətirə bilər.
Bizim bu gün vəzifəmiz odur ki, hərbi silahla yanaşı, bu media silahından da ümmətin məsələlərinə xidmət etmək üçün istifadə edək və dünya ictimai rəyinin həqiqəti olduğu kimi görməsini təmin edək.
İQNA: Şəhid Kərki ailəsi Livanda müqavimətin tanınmış ailələrindəndir. Belə bir ailədə yaşamaq gələcək nəsil üçün hansı məsuliyyətləri və mesajları daşıyır?
Hamımız hər şeydən əvvəl Kərbəla məktəbinə bağlıyıq; bizə güc, əqidə, yəqinlik, iman, səbir və dözüm bəxş edən məktəbə. Fədakar ailələrimiz bu gün Kərbəla dərslərinin təcəssümüdür; can, mal və övlad fəda etmək baxımından. Müsibətlərə qarşı göstərdiyimiz səbir bu irsin qorunmasına kömək edir.
İQNA: Livan xalqı son illərdə müharibədən tutmuş iqtisadi problemlərə qədər bir çox çətinliklərə dözüb. Sizcə, Livan cəmiyyətindəki bu nadir dözümlülük və dayanıqlılığın sirri nədədir?
Bütün bu dözüm və dayanıqlılığın arxasında, Allaha olan iman və Onun iradəsinə təslim olmaqdan sonra, əsas sirr İmam Hüseynin (ə) məktəbində gizlənir.
Həmçinin bizi müqavimət mühitində yetişdirən şəxslərin rolu – söhbət uca şəhid Seyid Həsən Nəsrullahdan gedir ki, o, bizim üçün ən yaxşı yardımçı və dəstəkçi idi, eləcə də onunla birlikdə olan və bu fədakar xalqın sadiq övladları olan yoldaşları.
Biz kökü yerdə sabit, budaqları isə göydə olan ağac kimiyik; izzətə çatmaq üçün bir-biri ilə yarışan şəhidlər.
4359522
