د پاکستان دفاع وزیر وائي؛که د اسرائيلو په وړاندې اوس مسلمانان یو موټی نه شول،نوسبا به د ټولو وار وي

ایکنانیوزد (دُنیا نیوز) له قوله راپور راکړ، د پاکستان د دفاع وزیر خواجه آصف په ولسی جرګې کې پخپلې وینا کې وویل ؛ټول اسلامي هېوادونه دې یو موټی شي او د اسرائیلو پر وړاندې دې مقابله وکړي، ځکه که  اوس اسلامی نړۍ  سره یو موټی نشي ،  نو نن د ایران او  سبا به د بل او بیا به د  ټولو وار وي.

د پاکستان د قومي اسمبلۍ په غونډې کې، چې د سپیکر ایاز صادق په مشرۍ ترسره شوه، دپاکستان  دفاع وزیر خواجه آصف په خپلې وینا کې وویل ،اوسمهال د ایران او اسرائیلو ترمینځ جګړه روانه ده. اسرائیلو پر ایران  ناروا  او وحشی ډوله برید وکړ، د ایران پوځي  تاسیسات  قوماندانان او ساینس پوهان ئې په نښه کړل  . په دې ټول  وضعیت کې اسرائیل یوازې نه دی او تر شا ئې ستره دسیسه ده.  ټول اسلامي هېوادونه دې یو موټی شي او د اسرائیلو پر وړاندې دې مقابله وکړي

هغه زیاته کړه چې ایران زمونږ ګاونډی هېواد دی، چې له پیړیو راهیسې ورسره اړیکې لرو، له ایران سره تاریخي تړاو لرو. د ازمېښت په دې شیبو کې مونږ په هر ډول له ایران سره یو، د ایران د ګټو حفاظت به کوو. ایرانیان زمونږ وروڼه دي، د دوي غم، درد او خپګان زمونږ ګډ دی. اسرائیلو یمن، ایران او فلسطین په نښه کړي دي. د اسلامي نړۍ یووالی اړین دی. که اوس د مسلمانانو نړۍ یو موټی نه شوه او مونږ چوپ پاتې شو، نو سبا به د پاکستان او بیا  به د ټولو وار راشي.

هغه وویل چې د اسلامي همکاریو سازمان (او آي سي) غونډه دې راوبلل شي، ټول اسلامي هېوادونه دې یو موټی شي او د اسرائیلو پر وړاندې دې مقابله وکړي. اوس د  اسرائیلو پر ضد په نړۍ کې پیاوړی غږ پورته شوی دی. د لوېدیځې نړۍ غیرمسلمان  وګړي د اسرائیلو پر ضد احتجاجونه کوي، د غیرمسلمانانو ضمیرونه راویښ شوي، خوله بده مرغه   مسلمانان   هماغه راز د  غفلت په خوب ویده دي.

https://dunya.com.pk/index.php/dunya-headline/HeadLineRoznama/889304_1