د داغستان هنرمند او د قرآن کریم د کتابت معنوي تجربه(فیلم)
د ایکنا د راپور له مخې، چې د الجزیرې له قوله یې خپور کړی راغلی دي، سلیمان آشیرلایف د عربي خوشنویسۍ (اسلامي خطاطۍ) او د اسلامي تزییناتو (تذهیب) په هنر کې له ۳۵ کلونو څخه زیاته تجربه لري او د ټول قرآن کریم لاسلیک یې بشپړ کړی دی. دا لاسته راوړنه په وروستیو لسیزو کې په دې سیمه کې یوه نادره پېښه ګڼل کېږي.
سلیمان، چې په داغستان کې د جوماتونو د تزیین او تذهیب له امله مشهور دی، په دیني او فرهنګي محفلونو کې ځانګړی درناوی لري او د عربي خوشنویسۍ د هنر د ساتنې او پراختیا لپاره د خپلو اوږدمهالو خدمتونو له امله یې ګڼ سیمهییز ویاړونه او جایزې ترلاسه کړې دي.
آشیرلایف الجزیره خبری چینل ته په خبرو کې وویل چې له عربي خوشنویسۍ سره یې مینه له ماشومتوبه پیل شوې، هغه مهال چې د لومړي ځل لپاره د عربي تورو ښکلا او بڼې ورته پام واړاوه.
هغه د کلونو په اوږدو کې په داغستان او نورو سیمو کې لسګونه جوماتونه په خپل هنر ښکلي کړي دي او مخکې له دې چې د ټول قرآن کریم د کتابت پرېکړه وکړي، د څه باندې سلو جوماتونو په تذهیب او ښکلا ورکولو کې ئې برخه اخیستې وه.
دغه خوشنویس وویل چې د خپل وخت ډېره برخه یې د قرآن کریم کتابت ته ځانګړې کړې وه او دا کار ئې د لمانځه او نورو ضروري چارو له وختونو پرته،د څلورو میاشتو او نولسو ورځو پرلهپسې ورځني کار په ترڅ کې بشپړ کړ.
هغه زیاته کړه چې ډېر خلک خپل زاړه قرآنونه د ارزونې لپاره ده ته راوړي،خو دی باور لري چې د قرآن اصلي ارزښت د خط ښکلا او د خوشنویس له خوا د هغو هنري اصولو په مراعاتولو کې دی چې د پېړیو په اوږدو کې د خوشنویسۍ استادانو وضع کړي دي.
آشیرلایف پرېکړه وکړه چې قرآن کریم په Thuluth Script ولیکي؛دا د عربي خوشنویسۍله تر ټولو پېچلو او ښکلو ډولونو څخه دی او معمولاً د جوماتونو په تزییناتو او د کعبې د پردې پر آیتونو لیکل کېږي.
هغه الجزیرې ته وویل چې د دې خط د انتخاب موخه یې د داسې اثر رامنځته کول وو چې د داغستان او قفقاز د خلکو له قرآن کریم سره ژوره اړیکه څرګنده کړي.
https://iqna.ir/fa/news/4356953
