له طنطا څخه تر حرمین شریفین پورې؛ د شیخ محمود علي البنا د ژوند روښانه پړاوونه(فیلم)
د ایکنا د راپور له مخې، چې د صدي البلد له قوله ئې خپور کړی راغلي دي، شیخ محمود علي البنا د قرآن کریم په تلاوت کې ځانګړی سبک او ځانګړې طریقه لرله. هغه په مصر او د نړۍ په بېلابېلو هېوادونو کې د قرآن کریم د تلاوتونو ستره خزانه په میراث پرېښې ده.
شیخ محمود علي البنا د مصر د قاریانو د اتحادیې په بنسټ اېښودلو کې مهم رول درلود او کله چې دغه اتحادیه په ۱۹۸۴ کال کې جوړه شوه، هغه د دې اتحادیې د مرستیال په توګه وټاکل شو.
هغه په ۱۹۴۸ کال کې، په داسې حال کې چې یوازې ۲۲ کلن و، د مصر له راډیو سره یوځای شو او د هغه وخت له تر ټولو ځوانو رسمي قاریانو څخه وګرځېد. د هغه غږ د نغمو د بډایه زېرمو، د دقیق او سمو تلاوتونو او پر اورېدونکو د ژور اغېز له امله ځانګړی شهرت درلود.
شیخ محمود البنا د رمضان المبارک د شپې د قرآني محفلونو په احیا کې د مصر په ګڼو مشهورو جوماتونو کې ګډون کړی و؛ له طنطا ښار د احمدي جومات څخه رانیولې، د قاهرې تر امام حسین (ع) جومات پورې.
هغه همدارنګه په ګڼو نړیوالو قرآني پلاوو او غونډو کې د مصر استازیتوب کړی دی، او د هغه غږ په حرمین شریفین، مسجد الاقصی، د دمشق په اموي جومات او همدارنګه د اروپا او آسیا په ګڼو سترو جوماتونو کې انګازې کړې دي.
شیخ محمود علي البنا د ۱۹۸۵ کال د جولای په شلمه، د ۵۹ کلونو په عمر، له هغه برکتناک ژوند وروسته وفات شو چې ټول ئې د قرآن کریم خدمت ته وقف کړی و. هغه د خپل خوږ او قدرتمند غږ، استادانه تلاوت، د قرآن د تدریس او په هېواد دننه او بهر د مصر د ویاړلي استازي په توګه د اسلامي نړۍ په حافظه کې تلپاتې ځای خپل کړی دی.
په پای کې، د دې راپور ترڅنګ د شیخ محمود علي البنا یوه ویډیو هم خپره شوې چې پکې د سورې نور لومړي لس آیتونه په ښکلي او اغېزشیدونکی غږ تلاوت کوي.
https://iqna.ir/fa/news/4365185
