دنیا نے عزاداری کے جلوسوں کا میڈیا بائیکاٹ کر رکھا ہے، علامہ امین شہیدی
ایکنانیوز- اسلام ٹائمز۔ ملک بھر کی طرح راولپنڈی میں بھی چہلم شہدائے کربلا عقیدت و احترام سے منایا گیا، چہلم سید الشہداء امام حسین علیہ السلام کا مرکزی جلوس صبح سویرے امام بارگاہ کرنل مقبول سے برآمد ہوا، جو اپنے مقررہ راستوں سے ہوتا ہوا قدیمی امام بارگاہ میں اختتام پذیر ہوا۔
فوارہ چوک میں شرکائے جلوس نے نماز ظہرین علامہ امین شہیدی کی اقتداء میں باجماعت ادا کی۔ نماز ظہرین سے قبل مجلس وحدت مسلمین پاکستان کے ڈپٹی سیکرٹری جنرل علامہ امین شہیدی نے عزادارن سید الشہداء سے خطاب کرتے ہوئے کہا کہ آج اربعین حسینی کے موقع پرعراق کی شاہراہوں پر حسینیوں کا ٹھاٹھیں مارتا سمندر جمع ہے۔ تمام تر خطرات اور دھمکیوں کے باوجود دو کروڑ سے زائد حسینی کربلا پہنچ چکے ہیں۔ علامہ امین شہیدی کا کہنا تھا کہ آج دنیا نے عزاداری کے جلوسوں کا میڈیا بائیکاٹ کر رکھا ہے۔ دنیا میں اگر کہیں صرف پانچ سو لوگ جمع ہو جائیں تو پوری دنیا کا میڈیا اپنے کیمروں کو وہاں فوکس کر دیتا ہے۔ اس وقت دو کروڑ سے زائد آزاد پسند انسان، جن کی فکریں اور روحیں کربلا اور حسین ابن علی (ع) سے جڑی ہوئی ہیں، کربلا میں حضرت امام حسین (ع) کو خراج تحسین پیش کر رہے ہیں۔ یہ عشق و محبت کی انتہا ہے۔ عشق حسین پاکیزہ شے ہے جس سے پاکیزہ انسان ہی مستفید ہو سکتے ہیں۔ ان کا کہنا تھا کہ ہمیں اپنے نوحوں اور مرثیوں میں حسین ابن علی (ع) کا وہ ولولہ پیدا کیا جائے کہ ہمارے نوحے خطبہ حضرت زینب (س) کی عکاسی کریں۔
