قدس سمیت امریکی مداخلت دنیا بھر میں تشویش ناک ہے/ قدس ریلی میں مذمت کی جائے گی۔ آغا رضا
امریکہ اسرائیل اور سعودیہ سمیت تمام اسلام دشمن اور ملک دشمن قوتیں تیزی سے فلسطین مخالف شیطانی ایجنڈے پہ عمل پیرا ہیں۔
ایکنا نیوز کی رپورٹ کے مطابق مجلس وحدت مسلمین کے مرکزی رہنما سید آغا رضا نے پریس کانفرنس میں کہا کہ جمعہ کے روزملک بھر میں یوم القدس منایا جائے گا اور فلسطین ،کشمیر و یمن کے مظلومین سے اظہار یکجہتی کے لیے بھرپور انداز میں ریلیاں نکالی جائیں گی۔
موجودہ ملکی و بین الاقوامی صورتحال اور خطے کے حالات ملک میں مزید ناامنی کی طرف اشارہ دے رہے ہیں۔۔۔امریکہ اسرائیل اور سعودیہ سمیت تمام اسلام دشمن اور ملک دشمن قوتیں تیزی سے اپنے شیطانی ایجنڈے پہ عمل پیرا ہیں۔۔۔ان حالات میں بروز جمعہ وطن عزیز میں یوم القدس یقینا بہت اہمیت کا حامل ہے۔
فلسطین کے مظلومین کی حمایت میں علامہ اقبال اور قائد اعظم کے نظریات ہمارے لیے بہترین لائحہ عمل ہیں۔القدس مسلکی مسئلہ نہیں بلکہ امت مسلمہ کا اور انسانیت کا باہمی مسئلہ ہے۔کشمیر و فلسطین میں انسانی حقوق کی پامالی کے بدترین واقعات رقم کئے جا رہے ہیں جن کے خلاف اقوام عالم کو انسانی اور اخلاقی بنیادوں پر آواز بلند کرنی چاہئے۔ ظالموں کی مخالفت اور مظلوموں کی حمایت ایک شرعی تقاضا ہے۔امریکہ ، بھارت اور اسرائیل دور عصر کے سب سے بڑے ظالم اور غاصب ہیں۔ان کے خلاف ملت تشیع بھرپور انداز میں احتجاج جاری رکھے گی۔
القدس پر اسرائیل کے غاصبانہ تسلط کے خاتمے کا وقت بہت قریب ہے۔القدس کی آزادی کو اب دنیا کی کوئی طاقت نہیں روک سکتی۔فلسطین کی وہ قوم جو کل تک اسرائیلی ٹینکوں کا مقابلہ پتھروں سے کرتی تھی آج جدید ٹیکنالوجی سے لیس ہے۔ عوامی مزاحمت نے اسرائیل کوعملی اورفکری طور پر شکست فاش سے دوچارکیا ہے۔امریکہ کے کندھے پر سوار ہو کر اسرائیل زیادہ دیر تک اپنی بقا کی جنگ نہیں لڑسکے گا۔فلسطین کی اس ترقی نے اسرائیل اور اس کے حواریوں کو خوفزدہ کر رکھا ہے۔اپنے وسعت پسندانہ عزائم کی تکمیل کے لیے دیکھے جانے والے گریٹر اسرائیل کا دیرینہ خواب آج چکنا چور ہو چکا ھے اور صیہونی اپنے غاصب حصے پر قبضہ برقرار رکھنے کے لیے بوکھلاہٹ میں ہاتھ پاوں مار رہے ہیں۔اسرائیل کی اس ناکامی کا سارا کریڈٹ امام خمینی کو جاتا ہے جنہوں نے انقلاب ایران کے بعد القدس کے مسئلے کو زندہ رکھنے کے لیے بھرپور آواز بلند کی۔ امام خمینی نے جمعة الوداع کے موقع پرپوری دنیا کے اندریوم القدس منانے کااعلان اس وقت کیا جب عالمی قوتیں اسرائیل کو ایک اٹل حقیقت منوانے پر تلی ہوئی تھیں۔
انہوں نے کہا وہ عالمی استکباری قوتیں جو فلسطینیوں سے ان کا آبائی علاقہ چھیننا چاہتی ہیں آج ہمارے وطن عزیز کی سلامتی و استحکام کو بھی تباہ کرنے پر تلی ہوئی ہیں۔امریکہ پاکستان کا بدترین دشمن ہے اور اس کی سالمیت کو نقصان پہنچانے کے لیے ایڑی چوٹی کا زور لگا رہا ہے۔دہشت گردوں کے ذریعے وطن عزیز کو عدم استحکام کا شکار کرنے کے ایجنڈے پر بڑی تیزی سے کام ہو رہا ہے۔دہشت گردی کے خلاف جنگ میں اس قوم نے پہلے ہی بہت نقصان اٹھایا ہے۔ہمارا ملک مزید کسی آزمائش کا متحمل نہیں ھوسکتا ۔وطن عزیز کی سلامتی کو یقینی بنانے کے لیے بیرونی مداخلت کا مکمل خاتمہ ناگزیر ہے۔ملک کے حساس معاملات میں امریکی مداخلت پر ہماری خاموشی وطن عزیز کے لیے سنگین خطرہ ثابت ہو سکتی ہے۔
نظرات بینندگان
