لیبیا یونیورسٹیز میں خواتین قرآنی مقابلے

ایکنا: لیبیا کی یونیورسٹیوں میں ہائیر کمیشن کے خواتین أمور کے تعاون سے قرآنی مقابلوں کا اہتمام کیا گیا ہے۔

ایکنا نیوز- خبررساں ادارے اخبار لیبیا کے مطابق لیبیا میں قرآن کریم کے حوالے سے منعقد ہونے والے مقابلے "زنان ذاکر" کے عنوان سے ہوں گے۔ اس سلسلے میں کمیٹی برائے اعلیٰ مقابلہ جات نے یونیورسٹی آف لیبیا میں ایک پریس کانفرنس کا انعقاد کیا جس میں ان مقابلوں کے منصوبوں اور اہداف کا اعلان کیا گیا۔

یہ مقابلے لیبیا کے  قرآن کریم کمپلیکس کے تعاون سے منعقد کیے جا رہے ہیں، اور ان کا مقصد اعلیٰ تعلیمی اداروں سے وابستہ خواتین کو قرآن حفظ کرنے کی ترغیب دینا، خواتین کی صلاحیتوں کو اجاگر کرنا، اور یونیورسٹیوں و تعلیمی اداروں میں قرآن کریم کی ترویج کے مثبت اثرات کو اجاگر کرنا ہے۔

کمیٹی کی سربراہ اور لیبیا کی وزارت اعلیٰ تعلیم میں خواتین کے دفتر کی ڈائریکٹر، سمیہ عبدالقادر، نے بتایا کہ ان مقابلوں میں مختلف زمروں میں شرکت کی جا سکتی ہے، جن میں مکمل قرآن کریم کا حفظ، آخری نصف قرآن کا حفظ، آخری چوتھائی قرآن کا حفظ، اور آخری تین پاروں کا حفظ شامل ہیں۔ ان زمروں میں شرکاء ایک دوسرے کے ساتھ مقابلہ کریں گے۔

طارق عبدالغنی محمود، جو مجمع قرآن کریم لیبیا کے صدر اور کمیٹی کے رکن ہیں، نے کہا کہ یہ مقابلے علم و دین کے امتزاج کو فروغ دیتے ہوئے طلبہ میں قرآن سے محبت کو پروان چڑھائیں گے تاکہ قرآن ان کی زندگی اور طرزِ عمل کا محور بن سکے۔ انہوں نے مزید کہا کہ یہ مقابلے اسلامی اقدار کو مستحکم کرنے اور مسلم خواتین کے معاشرتی کردار کو مضبوط بنانے کا ایک موقع ہیں، خاص طور پر اس لیے کہ خواتین نے دورِ صحابہ سے لے کر آج تک تعلیم و تربیت میں کلیدی کردار ادا کیا ہے۔/

4258176