رہبر انقلاب کی جانب سے سید عمار حکیم کے جرات مندانہ مؤقف کی قدردانی
ایکنا نیوز- عراق کی قومی حکمت تحریک کے میڈیا دفتر کے حوالے سے بتایا جاتا ہے کہ رہبر معظم انقلاب کا تحریری پیغام ایران کے سفیر بغداد محمد کاظم آل صادق اور ایرانی سفارتخانے کے ثقافتی مشیر نے سید عمار حکیم سے ملاقات کے دوران انہیں پیش کیا۔
اس پیغام میں رہبر ایران نے حالیہ حالات کے حوالے سے سید عمار حکیم کے مخلصانہ اور بہادرانہ مؤقف کے ساتھ ساتھ ان کی ہمدردی اور تعزیت کے اظہار کو بھی سراہا اور ایران کی حمایت میں ان کے نمایاں کردار پر زور دیا۔
اس ملاقات میں ایران اور عراق کے درمیان دو طرفہ تعلقات اور دونوں اقوام کے مابین روابط پر بھی تبادلہ خیال کیا گیا۔
سید عمار حکیم نے بھی ایک بار پھر اسلامی جمہوریہ ایران کے خلاف جارحیت کی مذمت کرتے ہوئے جنگ کے خاتمے اور خطے میں استحکام کی بحالی کا مطالبہ کیا، اور کشیدگی میں اضافے اور اس کے علاقائی و بین الاقوامی امن و سلامتی پر اثرات کے خطرات سے خبردار کیا۔
عراق کی قومی حکمت تحریک کے رہنما نے عراق کے عوام کی جانب سے مرجعیتِ اعلیٰ دینی کی اپیل پر ایران اور لبنان کے عوام کے لیے امداد جمع کرنے اور امدادی مہمات چلانے میں بھرپور شرکت کو سراہا، اور اس بات پر زور دیا کہ عراقی عوام نے دوست اور ہمسایہ اقوام کے ساتھ یکجہتی اور ہمدردی کی ایک نمایاں مثال پیش کی ہے۔
ملاقات کے اختتام پر ایرانی سفیر نے اسلامی جمہوریہ ایران کے رہبر کا خصوصی پیغام سید عمار حکیم کے حوالے کیا، جس میں ان کے مؤقف کی تعریف کی گئی اور رہبر معظم انقلاب اور ایران کی ممتاز شخصیات کی شہادت پر ان کی ہمدردی کو بھی سراہا گیا۔
صہیونی رژیم اور امریکہ کی جانب سے ایران کے خلاف جارحیت کے آغاز کے بعد عراق میں متعدد مراجع تقلید نے قابضین کے خلاف جہاد کا فتویٰ جاری کرتے ہوئے اسلامی جمہوریہ ایران کی حمایت کا اعلان کیا ہے۔
اسی سلسلے میں عراقی عوام نے مختلف شہروں میں اجتماعات منعقد کر کے ایران پر حملوں کی مذمت کی اور ایران کی حکومت، عوام اور مسلح افواج کی حمایت پر زور دیا۔
عراقی حکومت نے بھی بارہا ان حملوں کی مذمت کرتے ہوئے اس بات پر تاکید کی ہے کہ وہ اپنی سرزمین کو ایران کے خلاف کسی بھی جارحیت کے لیے استعمال نہیں ہونے دے گی۔
