بین الاقوامی کربلاء ایوارڈ قرآنی مقابلوں کا آغاز قاری طاروطی کی تلاوت سے
عراق سے ایکنا نیوز کی رپورٹ کے مطابق یہ مقابلے آستانۂ مقدس حسینی کے دارالقرآن کی جانب سے منعقد ہونے والے بین الاقوامی ہفتۂ قرآن کی سرگرمیوں کے سلسلے میں شروع ہوئے ہیں، جن میں 30 عرب اور اسلامی ممالک کے نمائندے شریک ہیں۔
افتتاحی تقریب میں عالمِ اسلام کی ممتاز قرآنی شخصیات، دینی علماء، جامعات کے اساتذہ و دانشور، مختلف مقدس زیارتی مقامات کے نمائندگان اور امام حسینؑ کے روضۂ مبارک کے زائرین کی بڑی تعداد نے شرکت کی۔
یہ قرآنی مقابلے بین الاقوامی ہفتۂ قرآنِ کربلا ہفتے کے آخر تک جاری رہیں گے۔ مقابلوں کا انعقاد حرمِ مطہر امام حسینؑ میں روزانہ شام 4 سے 6 بجے اور رات 8:30 سے 10 بجے تک عراقی وقت کے مطابق ہوگا۔
آستانۂ حسینی کے قرآنی میڈیا سینٹر کے سربراہ وسام نذیر الدلفی نے بتایا کہ تقریب کا آغاز مصر کے بین الاقوامی قاری شیخ عبدالفتاح الطاروطی کی تلاوتِ قرآنِ کریم سے ہوا، جس کے بعد حوزۂ علمیہ کے استاد سید ریاض الحکیم اور پھر دارالقرآن آستانۂ حسینی کے سربراہ شیخ خیرالدین علی الہادی نے خطاب کیا۔
انہوں نے مزید کہا کہ تقریب میں ایک دستاویزی فلم بھی پیش کی گئی جس میں کربلا بین الاقوامی ایوارڈ کی تاریخ اور اس کے گزشتہ ادوار کو دکھایا گیا، جن میں دنیا بھر کے نوجوان قرآنی ٹیلنٹس نے شرکت کی تھی۔
الدلفی کے مطابق بین الاقوامی ہفتۂ قرآن آستانۂ مقدس امام حسینؑ کی جانب سے منعقد کیے جانے والے نمایاں قرآنی پروگراموں میں سے ایک ہے، جو مختلف اسلامی ممالک کے قراء، حفاظِ قرآن اور قرآنی امور سے دلچسپی رکھنے والے افراد کو متنوع پروگراموں، مسابقات اور فکری و ثقافتی سرگرمیوں کے ذریعے ایک پلیٹ فارم پر جمع کرتا ہے۔
واضح رہے کہ عالمی ہفتۂ قرآن کی سرگرمیوں میں تلاوت و حفظِ قرآن کے شعبے میں کربلا بین الاقوامی ایوارڈ کے پانچویں دور کے علاوہ، بین الاقوامی ’’نوجوانوں‘‘ (نوخیز قرآنی ٹیلنٹس) مقابلوں کا پہلا دور، ’’نبأ عظیم‘‘ خطاطی نمائش کا چوتھا دور اور دیگر متعدد قرآنی پروگرام بھی شامل ہیں۔/
4356922
