اٹلی میں ادیان و مذاہب کے بین المذاہب مکالمے کا پہلا قومی منشور تیار
ایکنا نیوز کی رپورٹ کے مطابق، 25 جون 2026 کو روم میں ’’اطالوی طرزِ بین المذاہب مکالمہ‘‘ کے عنوان سے پہلے قومی منشور پر باضابطہ دستخط کیے گئے۔ یہ اقدام تین سالہ مشاورتی عمل کا نتیجہ ہے، جو 2023 میں شروع ہوا تھا۔ اس کا مقصد مکالمے کی ثقافت کو فروغ دینا، باہمی احترام کو مضبوط کرنا اور مذہبی اداروں کے درمیان تعاون کو وسعت دینا تھا تاکہ اطالوی معاشرے کی بہتر خدمت کی جا سکے۔
اس منشور میں مذہبی تنوع کو اطالوی معاشرے کے لیے ایک مثبت اور تعمیری قدر قرار دیا گیا ہے۔ دستاویز کے مطابق بین المذاہب مکالمہ اعتماد سازی، پرامن بقائے باہمی کے فروغ اور نفرت انگیزی، انتہا پسندی اور امتیازی رویوں کے مقابلے کا ایک مؤثر ذریعہ ہے۔
منشور میں متعدد عملی اصول اور عہد شامل کیے گئے ہیں جن کا مقصد بین المذاہب مکالمے کو ایک مستقل اور ادارہ جاتی عمل بنانا ہے۔ اس کے ذریعے مختلف مذہبی برادریوں کی مشترکہ خواہشات کو عملی منصوبوں اور سماجی اقدامات میں تبدیل کیا جائے گا جو پورے اطالوی معاشرے کے لیے مفید ہوں گے۔
اس قومی تقریب میں اسلامی ثقافتی مرکز اٹلی اور جامع مسجد روم نے بھی شرکت کی۔ مرکز کے سربراہ نعیم نصراللہ نے ادارے کی نمائندگی کرتے ہوئے منشور پر دستخط کیے۔
دستخطی تقریب کے بعد اٹلی کے صدر سرجیو ماتاریلا نے منشور پر دستخط کرنے والی مذہبی برادریوں کے نمائندوں کا کوئیرینال محل میں استقبال کیا اور دستاویز کی سرکاری نقل وصول کی۔ اس اقدام کو اٹلی کی حکومت کی جانب سے بین المذاہب مکالمے کی سرکاری حمایت اور سماجی یکجہتی و ثقافتِ ہم آہنگی کے فروغ کی علامت قرار دیا جا رہا ہے۔
یہ منشور اٹلی کی تاریخ میں پہلی مشترکہ قومی دستاویز ہے جس نے مختلف مذاہب کے رہنماؤں اور اداروں کو ایک مشترکہ وژن کے تحت جمع کیا ہے تاکہ مکالمے، تعاون اور باہمی احترام کو فروغ دیا جا سکے۔
واضح رہے کہ اٹلی کی آبادی تقریباً 5 کروڑ 90 لاکھ ہے، جن میں اندازاً 28 لاکھ مسلمان شامل ہیں، جو مجموعی آبادی کا تقریباً 4.7 فیصد بنتے ہیں۔ جامع مسجد روم اور اسلامی ثقافتی مرکز اٹلی ملک کے اہم اسلامی اداروں میں شمار ہوتے ہیں، جو ریاستی اور مذہبی اداروں کے ساتھ مکالمے اور مسلمانوں کی سماجی و عوامی زندگی میں مؤثر شرکت کے فروغ میں اہم کردار ادا کر رہے ہیں۔/
4360804
