76 yaşlı misirli qadının Quran oxumaq arzusu gerçəkləşdi

İQNA - Misirin Asuan şəhərindən olan yaşlı bir qadın, uzun illər savadsızlıqdan əziyyət çəkməsinə baxmayaraq, 76 yaşında Qurani-Kərimi oxumaq arzusunu reallaşdırmağı bacardı.

“İQNA”-nın "Misravi" saytına istinadən verdiyi xəbərə görə, Misirin Asuan bölgəsindən olan qadın, illərlə təhsildən məhrum qalsa da, nəvəsinin və özünün möhkəm iradəsi sayəsində savadsızlığa qalib gələrək Qurani-Kərimi oxumağı öyrəndi.

Fatimə Əli Məhəmməd, Misirin Sosial Həmrəylik Nazirliyi tərəfindən həyata keçirilən “Savadsızlığa yox, həmrəyliklə irəli” proqramında iştirak edərək savadlılıq imtahanını böyük uğurla keçib və illərlə içində yaşatdığı Quran oxumaq arzusunu gerçəkləşdirib.

Fatimənin nəvəsi Əla İsam nənəsinin həyatı haqqında danışaraq bildirib ki, nənəsi həyatının ilk illərində atasını itirib və bu səbəbdən təhsilini davam etdirə bilməyib. O, ibtidai məktəbin ikinci ilini tamamlamamış məktəbi tərk edib və ailəsinin ən kiçik övladı olduğu üçün bacı-qardaşları ona qayğı göstəriblər. Fatimə erkən yaşda ailə həyatı qurub və 9 övlad (5 oğul və 4 qız) dünyaya gətirib.

Əlanın sözlərinə görə, nənəsi öz şəraitinə baxmayaraq, övladlarının – həm oğlan, həm də qızlarının – təhsil almasına böyük həvəs göstərib ki, onlar onun yaşadığı taleyi yaşamasınlar. Nəticədə, onun iki qızı müəllimlik fakültəsini bitirib, üçüncü qızı isə beşillik müəllimlik proqramı üzrə diplom alıb. Hazırda onların hamısı məktəblərdə müəllim kimi fəaliyyət göstərir. Oğlan övladları isə orta təhsildə iştirak edərək ticarət və ya sənaye üzrə diplomlar əldə ediblər və analarının övladlarının təhsili ilə bağlı arzusunu həyata keçiriblər.

Əla əlavə edib ki, nənəsi savadlılıq dərslərinə qatıldıqdan sonra Qurani-Kərimi oxumaq arzusu yadına düşüb. O da nənəsinə əvvəlcə hərfləri və sadə sözləri yazmağı öyrədib, sonra isə onu digər şagirdlərlə birlikdə dərslərə yönləndirib. Beləliklə, hər gün savadsızlıqdan azad olma arzusu bir qədər də yaxınlaşırdı. Nəhayət, imtahan vaxtı gəlib çatdı və nənəsi tam uğurla imtahanı keçdi.

Əla, nənəsinin savadsızlıqdan xilas olması və Qurani-Kərimi oxumaq arzusunu gerçəkləşdirməsi ilə onun zəhmətlərini az da olsa qarşılaya bildiyinə görə böyük sevinc duyduğunu bildirib.

4296188