Misirdə Məscid Memarlığı üzrə Üçüncü Beynəlxalq Seminar keçiriləcək
“İQNA”-nın “bibalex”-ə istinadən verdiyi xəbərə görə, İsgəndəriyyə Kitabxanasının İslam Sivilizasiyası Araşdırmaları Mərkəzi (Bibliotheca Alexandrina) ilə Səudiyyə Ərəbistanının “Abdullatif Al Fozan Məscid Memarlığı Mükafatı” əməkdaşlıq çərçivəsində “Məscidlərdə minarə memarlığının təkamülü: köklər, rol və kimlik – gələcəyə baxış” mövzusu ilə üçüncü beynəlxalq məscid memarlığı seminarını keçirəcək.
Konfrans 2025-ci il avqustun 27–28-də İsgəndəriyyə Kitabxanasının konfrans zalında təşkil olunacaq.
Seminarda Misir, Səudiyyə Ərəbistanı, BƏƏ, İordaniya, Suriya, Yəmən, İspaniya və Türkiyədən alimlər iştirak edəcəklər.
Seminarda müzakirə olunacaq mövzular bunlardır:
Minarə memarlığı: “Abdullatif Al Fozan Məscid Memarlığı Mükafatı”nı qazanmış məscidlərin minarələri;
Məscid memarlığında minarə: rəmz, funksiya və gələcək
İslam şəhərinin vizual-estetik formalaşması və minarə memarlığı;
21-ci əsr üçün minarə dizaynı standartları;
Minarələr: ədədi əlaqə və planlaşdırma;
Minarənin müqəddəs keçmişlə gələcək ehtiyaclar arasında müasir bir simvol kimi rolu;
Müasir memarlıqda minarəsiz məscidlər;
Müasir məscid dizaynında minarənin zəruriliyi;
Avropa minarələri: Salonikidən İsveçrəyədək;
Qahirədə Osmanlı minarələrinin mövqeyi, forması və bəzəkləri baxımından təkamülü;
Minarədə tətbiq olunan İslam şəhərinin vizual-estetik formalaşması;
Misirdə minarə memarlığında Məğrib–Əndəlus təsirləri;
Moğol–Hind minarə memarlığı: dini, funksional və simvolik aspektlər;
Mərkəzi Asiyada qorunub qalmış ilkin minarə memarlığı;
16-18-ci əsrlərdə Qərbi Avropada qeyri-ənənəvi minarələrin təsirləri;
Osmanlı dövründən Məhəmməd Əli sülaləsinin sonuna qədər Misirdə minarələrin siyasi tətbiqi;
Əndəlusda ilk üməvi minarələri.
Seminar çərçivəsində həmçinin memarlıq, arxeologiya və incəsənət ixtisasında təhsil alan tələbələr üçün “Məscidlərin dizaynı və memarlığı: gələcəyə baxış” adlı təlim seminarı da keçiriləcək.
4300891
