Səudiyyə Ərəbistanında 150 ölkənin iştirakı ilə 5-ci Həcc Konfransı işə başlayıb
“Darul-Hilal” xəbər agentliyinin verdiyi məlumata görə, bu tədbir Səudiyyə Ərəbistanının Həcc və Ümrə Nazirliyinin təşkilatçılığı, kral Salman bin Əbdüləzizin himayəsi altında Ciddə şəhərində yerləşən “Jeddah Superdome” (Ciddə Super Qübbəsi) idman arenasında keçirilib və noyabrın 12-dək dörd gün davam edəcək.
Konfransın keçirilməsinin məqsədi qarşıdakı Həcc mövsümünə hazırlıq istiqamətində səylərin birləşdirilməsi, Həcc xidmətlərinin gələcəyinin müəyyənləşdirilməsi və zəvvar təcrübəsinin beynəlxalq standartlara uyğun olaraq təkmilləşdirilməsidir. Tədbirdə 150-dən çox ölkə və müxtəlif dövlət və özəl qurumlar, mütəxəssislər və sahibkarlar – həm Səudiyyə Ərəbistanından, həm də xaricdən iştirak edəcəklər.
Bu konfrans, zəvvarların sayının artması, onların ehtiyaclarının müxtəlifləşməsi və daha keyfiyyətli ibadət təcrübəsinə tələbatın yüksəlməsi fonunda, Həcc sisteminin əməliyyat, təşkilati və texniki səviyyələrdə səmərəliliyini artırmaq istiqamətində Səudiyyə hökumətinin səylərinin bir hissəsi kimi keçirilir.
Tədbirin məqsədlərindən biri də Həcc mərasimlərinin təhlükəsiz, nizamlı və səmərəli şəraitdə icra olunması üçün “ağıllı idarəetmə” üsullarına sərmayə yatırmaq, təcrübə mübadiləsi aparmaq və zəvvarların axınının idarə olunması və sahə xidmətlərinin təşkili üzrə ən son beynəlxalq təcrübələri öyrənməkdir.
Bu beynəlxalq illik konfransda dünyanın müxtəlif ölkələrindən gəlmiş mütəxəssislər, ekspertlər və nümayəndələr Həcc sistemində ən son innovasiyaları və həll yollarını müzakirə edəcəklər.
Konfransın proqramına 80-dən çox panel müzakirəsi və 60 ixtisaslaşmış təlim seminarı daxildir. Burada alimlər, tədqiqatçılar və Həcc idarələrinin nümayəndələri iştirak edəcək və 2400-dən çox dinləyici bu tədbirlərdən faydalanacaq.
Məlumata görə, Əlcəzairin dini işlər və vəqflər naziri Yusuf Belmehdi də konfransda iştirak edərək, Səudiyyə Ərəbistanının Həcc və Ümrə naziri ilə 1447/2026-cı il Həcc xidmətləri üzrə əməkdaşlıq sazişini imzalayacaq.
Qeyd edək ki, Jeddah Superdome (Ciddə Super Qübbəsi) 40 min tamaşaçı tutumuna malik çoxməqsədli tədbir məkanıdır və Mədinə yolu üzərində yerləşir. 2021-ci ilin iyun ayında açıldıqdan bəri burada çoxsaylı sərgilər, konfranslar və həm yerli, həm də beynəlxalq tədbirlər keçirilmişdir.
4315708
