48-dən çox ölkənin iştirakı ilə Əlcəzair Qurani-Kərim müsabiqəsi
“İQNA”-nın “Əlcəzair” radiosuna istinadla verdiyi xəbərə görə, Qurani-Kərimin hifzi və tilavəti üzrə 21-ci beynəlxalq yarış Əlcəzairin dini işlər və vəqflər naziri Yusif Bəlməhdi-nin nəzarəti altında açılıb və bu yarışda 48-dən çox ölkə iştirak edir.
Nazir jurnalistlərə açıqlamasında bildirib: “Bu mərhələ prezident Səid Əbdülməcid Tebbun-un dəstəyi ilə keçirilir və iştirakçı ölkələrin sayı 48-i keçib. Bu rəqəm yaxın saatlarda artaraq təxminən 50 ölkəyə çatacaq.”
Əlcəzairin vəqflər naziri vurğulayıb ki, bu say “Əlcəzair Mükafatı” Qurani-Kərim beynəlxalq müsabiqəsinin dünya arenasında davamlı şəkildə nüfuzunun artdığını göstərir.
Bəlməhdi-nin sözlərinə görə, bu yarış videokonfrans texnologiyası vasitəsilə və uzaqdan idarə olunaraq Əlcəzairin xaricdəki səfirlikləri, konsulluqları və diplomatik nümayəndəlikləri səviyyəsində təşkil edilib. Yarış beynəlxalq hakimlər komitəsinin nəzarəti altında keçirilir: dörd hakim Əlcəzairdən, biri Suriyadan və biri də Oman-dandır.
O əlavə edib: “Bu müsabiqə müxtəlif dövrlərdə yeni qariləri və seçilən istedadları tanımaq üçün fürsət yaradır. Eyni zamanda Əlcəzairin Qurani-Kərimə xidmət sahəsində – məscidlər, Quran məktəbləri, zaviyələr (ənənəvi Quran mədrəsələri) və tilavət heyətləri vasitəsilə – əldə etdiyi irəliləyişi nümayiş etdirir.”
Bəlməhdi bəyan edib: “Əlcəzair dövləti prezidentin göstərişlərinə uyğun olaraq beynəlxalq Qurani-Kərim müsabiqələrini dəstəkləyir və yeni sahələrin artırılması, pul mükafatlarının dəyərinin yüksəldilməsi ilə Allahın kitabını daşıyanlara (qarilər və hafizlər) xüsusi diqqət göstərir.”
Bu yarışın ilkin mərhələsi sabah, dekabrın 31-i tarixinədək davam edəcək. Bu mərhələdə müxtəlif ölkələrdən 20 nəfər seçilərək “İsra və Merac” hadisəsi münasibətilə keçiriləcək final mərhələsində iştirak üçün təqdim olunacaq.
4325866
