ABŞ hakimindən Trampın Fələstin tərəfdarı tələbəni deportasiya etmək cəhdinə rədd cavabı
“İQNA”-nın “əl-Cəzirə”yə istinadən verdiyi xəbərə görə, Taffts Universitetinin doktorantı Rumeysa Öztürkün vəkilləri bildiriblər ki, bir hakim ötən il universitetlərdə Fələstin tərəfdarı fəallara qarşı aparılan təzyiqlərin bir hissəsi kimi həbs edilməsindən sonra Tramp administrasiyasının onu deportasiya etmək cəhdini rədd edib.
Öztürkün vəkilləri Nyu-Yorkdakı ABŞ Apellyasiya Məhkəməsinə təqdim etdikləri qeyddə may ayında miqrasiya saxlanma mərkəzindən azad olunmasına səbəb olan qərarı nəzərdən keçirən hakim tərəfindən verilmiş qərarın detalları barədə məlumat veriblər.
Amerika Mülki Azadlıqlar İttifaqının (ACLU) vəkilləri bildiriblər ki, 29 yanvar tarixində bir miqrasiya hakimi Daxili Təhlükəsizlik Nazirliyinin Öztürkün deportasiyası üçün heç bir əsas təqdim etmədiyi qənaətinə gəlib və işə baxılmasını dayandırmaq qərarı verib.
Bu qərar Öztürkün tələbə vizasının ABŞ Dövlət Departamenti tərəfindən ləğv edilməsindən sonra ötən ilin martında Massaçusetsdə küçədə miqrasiya rəsmiləri tərəfindən həbs edilməsi ilə başlayan prosesə son qoyur.
Rəsmilərin vizanı ləğv etmək üçün göstərdikləri yeganə səbəb Öztürkün bir il əvvəl Taffts Universitetinin tələbə qəzetində yazdığı məqalə idi. Həmin məqalədə o, universitetin Qəzzadakı İsrail müharibəsinə reaksiyasını tənqid etmişdi.
Uşaq inkişafı üzrə tədqiqatçı olan Öztürk bəyanatında deyib:
“Bu gün rahat nəfəs alıram, çünki məhkəmə sisteminin qüsurlarına baxmayaraq, mənim işim ABŞ hökuməti tərəfindən haqsızlığa məruz qalan başqalarına ümid verə bilər.”
Öztürkün Boston ətrafında həbs edilməsi videoya çəkilmiş və sürətlə yayılaraq geniş ictimai qınağa səbəb olmuşdu.
Fulbrayt təqaüdünün keçmiş tədqiqatçısı olan Öztürk Luizianadakı saxlanma mərkəzində 45 gün qaldıqdan sonra Vermontdakı federal hakim onun dərhal azad edilməsinə qərar verib. Hakim müəyyən edib ki, onun saxlanması “qanunsuz qisas tədbiri”dir və söz azadlığı hüququnu pozur.
Ötən ay Boston federal hakimi qərara alıb ki, ABŞ hökuməti Öztürk kimi tədqiqatçıların həbs və deportasiyası ilə bağlı “qanunsuz siyasət” yürüdüb və bunun nəticəsində universitetlərdə vətəndaş olmayan akademiklərin söz azadlığını məhdudlaşdırıb.
4333767
