İnqilabın Ali Rəhbəri : Gəmidən daha təhlükəlisi onu dənizin dibinə batıra biləcək silahdır
İQNA-nın Ali Məqamlı Rəhbərin ofisinin informasiya portalına istinadən verdiyi xəbərdə bildirilir ki, İslam İnqilabının Ali Rəhbəri, çərşənbə – 28 bəhmən (17 fevral) tarixində Təbriz və Şərqi Azərbaycanın minlərlə coşqun sakini ilə görüşündə bu ili qəribə və hadisələrlə dolu bir il adlandırdı. O, “12 günlük müharibədə xalqın qələbəsi”, “Dey ayının ağır və mühüm fitnəsinin diz çökdürülməsi” və “22 dey və 22 bəhmən tarixlərində xalqın möhtəşəm və heyrətamiz yürüşləri”ni əziz İran xalqının qüdrət və diriliyinin nişanəsi kimi dəyərləndirdi. Həmçinin “hazırlıq, ayıqlıq və milli birliyin” qorunub gücləndirilməsinin vacibliyini vurğulayaraq əlavə etdi: düşmənlərlə əlaqəli başçılar və fəsad törədən ünsürlər istisna olmaqla, iğtişaşlarda həlak olan bütün şəhidləri və dünyasını dəyişənləri – “cəmiyyətin təhlükəsizliyi və asayişini qoruyan qüvvələri”, “günahsız yoldan keçənləri” və hətta “sadəlövhlük və qəzəb səbəbilə fitnəyə qoşulan aldadılmışları” – öz övladlarımız bilirik və onların hamısının dərdinə şərik, matəmli və kədərliyik.
Həzrət Ayətullah Xamenei dövlət rəsmilərinin problemlərin həlli, inflyasiyanın cilovlanması və milli valyutanın dəyərinin qorunması üçün daha çox çalışmasını vurğuladı. O, çıxışının başqa bir hissəsində ABŞ rəsmiləri və mediasının İranla bağlı əsassız müdaxilələri və həyasız təhdidlərinə işarə edərək dedi: özləri də bilirlər ki, bu sözlərə və addımlara tab gətirə bilməzlər və “özünü dünyanın ən güclü ordusu hesab edən ordu” elə bir şillə yeyə bilər ki, yerindən qalxa bilməsin. Bununla yanaşı, təhdidlərə qarşı məsul qurumlar lazımi hazırlığa malikdir və xalq arxayınlıqla öz işi və həyatına davam etməlidir.
Bu görüşdə – Təbriz xalqının 29 bəhmən 1356-cı il (18 fevral) tarixli taleyüklü qiyamının ildönümü ərəfəsində – o həzrət həmin qiyamın xüsusiyyətlərini “zamanı düzgün dəyərləndirmək, vaxtında hərəkət etmək və fədakarlıq” kimi səciyyələndirdi. O, Azərbaycanın gənc nəslinin müxtəlif meydanlarda sevindirici və ümidverici iştirakını yüksək qiymətləndirərək dedi: Təbriz xalqının 22 bəhmən yürüşündə ikiqat iştirakı göstərdi ki, təbrizlilər bütün İran xalqı kimi diri və ruhludurlar və belə bir xalq heç vaxt siyasi oyunlara və düşmənin hiylələrinə aldanmaz.
Rəhbər bu ili “İran xalqının əzəmətinin, iradəsinin, möhkəm qətiyyətinin və digər bacarıqlarının dəfələrlə nümayiş olunduğu bir il” adlandırdı və əlavə etdi: xalq təkrar-təkrar güc göstərərək və dayanaraq İranı başıuca və əziz etdi. Bu günlərdə xarici səfərlərə gedən məsullar da həmin ölkələrin rəsmiləri ilə görüşlərdə xalqın bu xüsusi ucalığını açıq şəkildə hiss edirlər.
O həzrət “Dey ayı fitnəsinin mahiyyətinin və ölçülərinin düşüncə və təhlil sahibləri tərəfindən izah edilməsini” zəruri saydı və dedi: baş verən hadisə bir neçə qəzəbli gəncin və qeyri-gəncin hərəkəti və iğtişaşı deyildi; bu, İran xalqının ayaqları altında əzilən “planlaşdırılmış bir çevriliş” idi.
Həzrət Ayətullah Xamenei bu həqiqəti açıqlayaraq əlavə etdi: ABŞ və sionist rejimin kəşfiyyat və casusluq qurumları, bəzi digər ölkələrin kəşfiyyat orqanlarının köməyi ilə, çoxdan bəri bir şər qrup və ya şər meyilli şəxsi cəlb edib xaricdə onlara təlim, pul və silah verdilər və onları hərbi və dövlət mərkəzlərinə hücum və təxribat üçün ölkəyə göndərdilər ki, münasib fürsətdə meydana daxil olsunlar. Bu fürsət də Dey ayının ortalarında onların əlinə keçdi.
Rəhbər “təcrübəsiz və sadə bir qrup insanı təsir altına almaq və qəzəbləndirmək”i fitnənin təşkilatçı və icraçılarının digər addımı kimi qeyd edərək dedi: təlim görmüş ünsürlər bu cür adamları önə göndərdilər və özləri də müxtəlif silahlarla və “kobud və amansız hərəkət” siyasəti ilə meydana girdilər və İŞİD kimi qəribə bir vəhşiliklə “yandırdılar, öldürdülər və dağıtdılar”.
O həzrət bu addımların əsas məqsədini sistemin əsaslarını sarsıtmaq adlandırdı və dedi: əlbəttə, polis qüvvələri, Bəsic, Sepah və çoxlu sayda xalq iğtişaşçılara qarşı dayandı və bütün hazırlıq və böyük xərclərə baxmayaraq “çevriliş” açıq şəkildə məğlub oldu və meydanın qalibi xalq oldu.
Həzrət Ayətullah Xamenei “22 dey və 22 bəhmən tarixlərindəki heyrətamiz yürüşləri” “ilahi nişanələrdən” adlandırdı və vurğuladı: bu cür düşmənlərin pis niyyət və fitnələrinə qalib gələn əziz xalq “hazırlıq, ayıqlıq və milli birlik”lə bu açıq ilahi lütfü qoruyub saxlamalıdır.
O həzrət iğtişaşlarda axıdılan qanlar barədə əlavə etdi: fitnənin başçıları və çevrilişçilərdən olan bir qrup cəhənnəmə vasil oldu və onların işi Allahla olacaq, lakin digər üç dəstənin bütün dünyasını dəyişənləri öz övladlarımız bilirik və hamısı üçün matəmdəyik.
O, birinci dəstə dünyasını dəyişənləri – “polis, Bəsic, Sepah və onlarla birgə olan xalqı” – cəmiyyətin və sistemin təhlükəsizliyi, asayişi və sağlamlığının ən üstün şəhidləri adlandırdı və əlavə etdi: ikinci dəstə – yoldan keçənlər və günahsız insanlar – də şəhid sayılır; çünki düşmənin yaratdığı fitnə içində güllə ilə vurulub həyatlarını itiriblər.
Rəhbər əlavə etdi: üçüncü dəstə dünyasını dəyişənlər “aldadılmış, sadəlövhlük edib fitnəçilərlə birgə olanlardır”; onlar da bizdəndir, bizim övladlarımızdır və biz onların da dərdinə şərikik. Biz bütün dünyasını dəyişənlər üçün Allahın rəhmət və məğfirətini diləyirik.
O həzrət əlavə etdi: bu aldadılmışlardan bəziləri ki, nə həbs olunublar, nə də həbsxanaya düşüblər, mənə məktub yazaraq peşmanlıqlarını bildiriblər və halallıq istəyiblər.
Həzrət Ayətullah Xamenei amerikalıların İŞİD-i yaratdıqlarını etiraf etmələrinə işarə edərək dedi: o İŞİD az-çox məhv edilib, amma bunlar “yeni İŞİD-lər”dir və bu məsələdə həm bütün məsullar, həm də xalq diqqətli olmalıdır; xüsusilə də gənclər ayıq və ehtiyatlı olsunlar ki, kim onlara nə deyir və hansı təklifi verir.
Rəhbər vurğuladı: xalq iğtişaşçı və fəsad törədən əsas dəstənin təqib və cəzalandırılmasını tələb edir və məhkəmə və təhlükəsizlik qurumları bu şəxsləri mühakimə edib cəzalandırmağa borcludurlar. Həmçinin “söz, təhlil və əməl” ilə düşmənə yoldaşlıq edənlərlə də ədalətli məhkəmə rəftarı aparılmalıdır.
O həzrət əlavə etdi: böyük ehtimalla Amerikanın İslam Respublikası ilə bağlı növbəti planı da bu üslubda və bu cür işlərdən ibarət olacaq; əlbəttə, şübhəsiz ki, ilahi lütf və xalqın hazırlığı və diriliyi sayəsində bu qəbildən olan hərəkət xalqın sərt qarşısı ilə məhv ediləcək.
Rəhbər çıxışının başqa bir hissəsində ABŞ-ın çoxsaylı iqtisadi, siyasi və sosial problemlərini Amerika imperiyasının tənəzzül və süqut prosesinin əlamətləri adlandırdı və dedi: Amerikanın bizimlə problemi budur ki, İranı udmaq istəyir, lakin İran xalqı və İslam Respublikası onların bu məqsədinə mane olur.
O həzrət ABŞ prezidentinin hədələyici sözlərini onların İran xalqına hakim olmaq arzularının göstəricisi kimi dəyərləndirdi və əlavə etdi: İran xalqı öz İslami və Şiə dərslərini yaxşı bilir və nə vaxt nə etməli olduğunu da gözəl anlayır.
Həzrət Ayətullah Xamenei ABŞ-ın fəsadkar və zalım imperiyasının süqutunun digər əlamətlərindən birinin onların məntiqsizliyi olduğunu qeyd edərək dedi: onların məntiqsizliyinin nümunəsi İran məsələlərinə, o cümlədən bizim mühüm məsələlərimizdən biri olan silah məsələsinə müdaxilə etmələridir.
O həzrət “xalqın çəkindirici silahlara sahib olmasını” zəruri və vacib adlandırdı və əlavə etdi: hər bir ölkə çəkindirici silahlara malik olmadıqda düşmənlərin ayaqları altında əzilər, lakin amerikalılar silah məsələsinə müdaxilə edərək deyirlər ki, siz filan növ və ya filan mənzilli raketə sahib olmamalısınız. Halbuki bu məsələ İran xalqına aiddir və onlara heç bir dəxli yoxdur.
Rəhbər ABŞ-ın İranın ölkənin idarəsi, tibbi, kənd təsərrüfatı və enerji ehtiyacları üçün dinc nüvə sənayesinə sahib olmaq haqqına müdaxiləsini onların başqa bir məntiqsizlik nümunəsi adlandırdı və amerikalılara xitabən dedi: bu məsələ İran xalqına aiddir. Sizə nə dəxli var?
O həzrət xalqın “Nüvə enerjisi bizim ayrılmaz haqqımızdır” şüarına işarə edərək dedi: nüvə obyektlərinə və zənginləşdirməyə sahib olmaq haqqı beynəlxalq müqavilələrdə və Atom Enerjisi üzrə Beynəlxalq Agentliyin nizamnamələrində bütün ölkələr üçün tanınıb və amerikalıların milli hüquqlara müdaxiləsi onların keçmiş və indiki məsullarının pozğun düşüncəsinin göstəricisidir.
Həzrət Ayətullah Xamenei amerikalıların daha qəribə məntiqsizliyini onların danışıqlara dəvət tərzində gördüyünü bildirərək vurğuladı: onlar deyirlər gəlin nüvə enerjisi barədə danışıqlar aparaq, amma danışıqların nəticəsi bu olmalıdır ki, siz nüvə enerjisinə sahib olmayasınız!
Əgər danışıqlar belə aparılacaqsa, həqiqətən də - danışıqlar üçün yer yoxdur - əgər danışıqlar aparılacaqsa, danışıqların nəticəsini əvvəlcədən müəyyən etmək səhv və axmaqlıqdır. Deməli, siz deyirsiniz ki, gəlin filan məsələni müzakirə edək, razılığa gələk, niyə nəticəni müəyyən edirsiniz, biz mütləq bu razılığa gəlməliyik! Bu, axmaqlıqdır.
İranın Ali Rəhbəri Ayətullah Seyid Əli Xamenei bildirib ki, xalqın çəkindirici silahlara malik olması “zəruri və vacibdir”. Hər hansı ölkə belə imkanlardan məhrum olarsa, düşmənlərin təzyiqləri altında əziləcək.
ABŞ-nin İranın silahlanma və raket mənzili məsələsinə müdaxilə etməsi əsassızdır və bu, İran xalqının suveren qərar səlahiyyətinə aiddir.
“Bədnam ada” qalmaqalında üzə çıxan fəsad faktları Qərb sivilizasiyasının və liberal-demokratik modelin mahiyyətinin göstəricisidir.
Bu hadisə Qərb liderləri ilə bağlı iddiaların yalnız bir nümunəsidir və gələcəkdə başqa faktların da açıqlanması mümkündür.
Amerikalılar müharibə ilə hədələsələr də, bilirlər ki, özlərinin siyasi, iqtisadi problemləri və beynəlxalq nüfuz-etibar məsələlərinə görə bu cür addımların yükünü daşımaq gücündə deyillər.
Amerika Birləşmiş Ştatlarının Prezidenti ordularının dünyanın ən güclü ordusu olduğunu deyir. Dünyanın ən güclü ordusuna bəzən elə güclü şillə vurula bilər ki, ayağa qalxa bilməz. Onlar daim deyirlər ki, biz İrana gəmi göndərmişik. Əlbəttə ki, gəmi təhlükəlidir, amma gəmidən daha təhlükəlisi bu gəmini dənizin dibinə batıra biləcək silahdır.
Amerika Birləşmiş Ştatlarının Prezidenti son çıxışlarından birində bildirib ki, 47 ildir ki, ABŞ İslam Respublikasını məhv edə bilməyib; o, öz xalqına şikayət edib. 47 ildir ki, ABŞ İslam Respublikasını məhv edə bilməyib. Bu, yaxşı bir etirafdır. Mən deyirəm: “Sən də bunu edə bilməyəcəksən.”
4335010
