BMT baş katibi müsəlmanlara qarşı ayrı-seçkiliyi tənqid etdi
“İQNA”-nın “SANA” agentliyinə istinadən verdiyi xəbərə görə, BMT baş katibi Antonio Quterreş bazar günü dünya üzrə müsəlmanlara qarşı ayrı-seçkilik və qərəzin aradan qaldırılmasının vacibliyini qeyd edib və bildirib ki, dünyanın müxtəlif guşələrindən olan iki milyard müsəlman bəşəriyyətin böyük müxtəlifliyini təcəssüm etdirir.
Quterreş İslamofobiya ilə Mübarizə üzrə Beynəlxalq Günü münasibətilə yayımladığı mesajda vurğulayıb ki, müsəlmanlar çox vaxt institusional ayrı-seçkilik, sosial və iqtisadi məhrumiyyət, qərəzli miqrasiya siyasətləri, eləcə də ədalətsiz nəzarət və təqiblərlə üzləşirlər.
O əlavə edib ki, bu tendensiyalar anti-islam ritorikası və açıq nifrət nitqləri ilə qızışdırılır və bəzən fərdlərə və dini məkanlara qarşı təqib və zorakılığa gətirib çıxarır.
Baş katib dövlətləri nifrət nitqinə qarşı mübarizə aparmağa, dini azadlıqları qorumağa və ayrı-seçkiliyi aradan qaldırmağa yönəlmiş konkret addımlar atmağa çağırıb. O, həmçinin beynəlxalq insan hüquqları qanunlarına tam riayət olunmasının və İslamofobiyanın hər bir ölkədən və hər bir cəmiyyətdən kökündən təmizlənməsinin vacibliyini vurğulayıb.
Quterreş bildirib ki, sosial platformalar din və ya etiqad əsasında insanlara qarşı nifrət və təqibi aradan qaldırmalıdır.
BMT baş katibi bir daha BMT-nin bərabərlik, insan hüquqları və hər bir insanın ləyaqətinə sadiqliyini vurğulayıb.
O qeyd edib ki, dözümsüzlük, ksenofobiya və ayrı-seçkilik harada olursa-olsun, hər kəs buna qarşı söz deməlidir.
İslamofobiya ilə Mübarizə üzrə Beynəlxalq Günü 15 mart 2022-ci ildə BMT tərəfindən təsdiqlənib və məqsədi müsəlmanlara qarşı ayrı-seçkilik və qərəzlə mübarizə aparmaq, dözümlülük, insan hüquqları və dinlərarası həmyaşayışı təşviq etməkdir. Bu tarix 2019-cu ildə Yeni Zelandiyanın Kraystçörç şəhərində iki məscidə silahlı hücum nəticəsində 51 nəfərin öldürülməsi və çoxsaylı insanların yaralanmasının ildönümünə təsadüf edir və İslamofobiyanın təhlükəsini və ona qarşı mübarizənin əhəmiyyətini dünya ictimaiyyətinə xatırlatmaq məqsədi daşıyır.
4341264
