Qüds müftisindən yazılı səhv olan Quran nüsxəsinin yayılması barədə xəbərdarlıq
“İQNA”, “Nəbz” xəbər portalına istinadən xəbər verir ki, Qüdsün baş müftisi və Ali Fətva Şurasının sədri Şeyx Məhəmməd Hüseyn açıqlamasında bildirib ki, Quranın bir nüsxəsində yazı səhvi aşkar edilib və bu məsələ ciddi diqqət tələb edir.
O, mətbuat bəyanatında izah edib ki, səhv 354-cü səhifədə, Nur surəsinin 33-cü ayəsində baş verib. Burada “يُغْنِهِم” (onları ehtiyacdan azad edər) kəlməsi, “y” hərfinin altındakı nöqtənin olmaması səbəbindən yanlış yazılıb. Bu, düzəldilməli olan bir yazı səhvidir.
Müftinin sözlərinə görə, həmin nüsxə Beyrutda Daru İhyai-t-Türas əl-Ərəbi tərəfindən nəşr olunub. O vurğulayıb ki, belə səhvlər, hətta qeyri-ixtiyari olsa belə, Quranın müqəddəsliyi və mətnin tamlığının qorunması baxımından son dərəcə həssas məsələdir.
Şeyx Məhəmməd Hüseyn kitabxanalara, nəşriyyatlara və bu nüsxəni əldə edən vətəndaşlara müraciət edərək, həmin Quranları dərhal Ümumi Fətva Şurasına təhvil vermələrini istəyib ki, müəyyən olunmuş prosedurlara uyğun tədbirlər görülsün və onun yayılmasının qarşısı alınsın.
O, Quran nüsxələrinin çapında ən yüksək dəqiqlik və nəzarətin vacibliyini vurğulayıb. Xüsusilə bəzi çap evlərinin sürətli çap və ya əvvəlki nəşrlərin kifayət qədər redaktə olunmadan yenidən çapı kimi üsullara əl atmasının mətnə təsir edən səhvlərə yol aça biləcəyini qeyd edib.
Müfti əlavə edib ki, Quranın tamlığının qorunması kollektiv məsuliyyətdir və bunun üçün aidiyyəti qurumların, nəşriyyatların və bütün müsəlmanların daimi diqqəti tələb olunur.
4345932
