Netanyahu Qəzzəyə yeni hücum başlatmağın ardınca gedir
“İQNA”-nın ivrit mənbələrinə istinadən verdiyi xəbərə görə, Haaretz qəzetinin hərbi analitiki Amos Harel cümə günü bildirib ki, Benyamin Netanyahunun seçki maraqları naminə Qəzzaya yeni hücum başlatmaq cəhdləri müşahidə olunur.
Harel cümə günü dərc olunan məqaləsində yazıb ki, “son vaxtlar Qəzzada Həmasın artan gücü barədə təkrarlanan ifşalar və bunun ardınca gələn siyasi açıqlamalar təsadüfi deyil. Kabinet Qəzza zolağına yeni hücuma hazırlaşır.”
O əlavə edib ki, əgər Trampın İran və Livanda müharibəni dayandırmaq qərarı qüvvədə qalsa, Netanyahu xüsusilə oktyabr seçkiləri yaxınlaşdıqca digər cəbhələrdə müharibə alovunu sönməyə qoymaq istəmir.
Harel qeyd edib ki, bu proses Netanyahunun əleyhdarlarının onu Qəzzada “tam qələbə” adlandırdıqları nəticəyə nail olmamaqda ittiham etməsi ilə eyni vaxta təsadüf edir. Onun fikrincə, Qəzza zolağında yenidən müharibə başlatmaq baş nazirə “elan etdiyi hədəfdən” geri çəkilmədiyini göstərmək imkanı verə bilər.
Harel vurğulayıb ki, İsrailin son hava hücumlarının təhlili onların bəzilərinin “sarı xətt” adlandırılan həddi keçdiyini göstərir. O deyib: “Bu hücumlarda xeyli sayda fələstinli mülki şəxs həlak olur və görünür ki, bəziləri Həmasın böyük bir səhv edib İsrailə raket atmasını gözləyir.”
Bu arada Qəzza zolağındakı Fələstin müqavimət qrupları bəyanat yayaraq bildiriblər ki, son 24 saat ərzində İsrail tərəfindən törədilən cinayətlər ABŞ-ın dəstəyi və beynəlxalq səssizlik fonunda fələstinlilərə qarşı aparılan genişmiqyaslı və təşkilatlanmış müharibənin davamıdır.
Fələstin İnformasiya Mərkəzinin məlumatına görə, bəyanatda vurğulanıb ki, Xan Yunisdə və Şeyx Rizvan bölgəsində fələstinli polis postlarının və patrullarının hədəfə alınması, eləcə də Kəmal Advan xəstəxanası yaxınlığında mülki şəxslərə hücum tammiqyaslı hərbi cinayət sayılır və zorakılığın sistematik şəkildə həyata keçirildiyini göstərir.
Müqavimət qrupları həmçinin bildiriblər ki, bu hücumların artması atəşkəsin möhkəmləndirilməsi istiqamətindəki səyləri zəiflətməyə yönəlib və beynəlxalq ictimaiyyətin səssizliyi ilə vasitəçilərin acizliyi bu vəziyyətin qarşısını almaqda davamlı uğursuzluğu əks etdirir.
4348417
