Əl‑Əfasinin azdırıcı ideologiyası özünə təhqir və zərərdir
Əl‑Əfasinin son mövqeləri onun əsl düşüncə və etiqadını aşkara çıxarır
Küveytin məşhur qarisi və Böyük Məscidin imamı olan Məşari əl‑Əfasi yaxın günlərdə “Təbbət yədəyn İran vəl‑li məə İran” adlı video yayımlayaraq İslam Respublikasını dəstəkləyən hər kəsə qarşı həqiqi simasını nümayiş etdirdi.
O, bu videoda “تَبَّتْ يَدَا أَبِي لَهَبٍ وَتَبَّ” ayəsini təhrif edərək “İranın və İxvanul‑Musliminin əlləri qurusun” şüarını səsləndirib, lakin nə Qəzzada sionist rejimin cinayətlərinə, nə də Minabda günahsız qızların qətliamına işarə edib. Əksinə, bəzi ərəb rejimlərinin rəhbərlərini tərifləyib.
Bu kuveytli qari İslam dünyasında və sosial mediada qazandığı şöhrətdən sui‑istifadə edərək bəzi ərəb rejimlərinin əlində alətə çevrilib. O, bundan əvvəl də Donald Trampdan İrana qarşı “cəhənnəm qapılarını açmağı” tələb etmişdi.
Əli Xəfaci: Əfasinin şüarı ədalətsiz və təhqiramizdir
İraqın seçkin qarisi Əli Xəfaci İQNA‑ya müsahibəsində Əfəsinin ABŞ–sionist təcavüzünə dəstək verən mövqelərini pisləyib və onun bu davranışını İran İslam Respublikasına qarşı ədalətsiz və təhqiramiz şüar adlandırıb.
O deyib: “Biz bu ədalətsiz şüarı elə bir vaxt eşitdik ki, İran dünyanın ən zalım gücləri – ABŞ və sionist rejim – ilə mübarizə aparır.”
Xəfaci əlavə edib: “Əfasi bu şüarla Tramp və Netanyahu üçün tribunaya çevrilib və insanlıq, din və əxlaqla seçilən İran xalqına qarşı çıxıb.”
O xatırladıb ki, İran hətta düşmənlə müharibədə belə Peyğəmbər (s) və Əhli‑beytin (ə) əxlaqını nümayiş etdirib.
“Gözəl səs kifayət deyil; iman və mövqe lazımdır”
Xəfaci Əfasinin fikirlərinin İslam dünyasında təsiri barədə deyib ki, bir çox ərəb ölkələrində sosial media istifadəçiləri bu mövqeni pisləyir və məsxərəyə qoyurlar. Onların fikrincə, Əfasinin musiqi və nəğmə tərzindəki çıxışları haramdır və iman yolundan sapmadır.
O bildirib: “Əfasi azdırıcı bir ideologiya seçib və günahlarının nəticəsini özü çəkəcək. O, bu çıxışı ilə İran İslam Respublikasına zərər verməzdən əvvəl özünə zərər vurub və bu, açıq‑aydın görünür.”
Xəfaci məşhur ifadəni xatırladıb: “Neçə‑neçə qarilər var ki, Quran onları lənətləyir.”
O, İbn Mülcəm nümunəsini də çəkərək deyib ki, o da gözəl səsə malik qari idi, lakin doğru etiqad və möhkəm iman olmadıqda gözəl səsin heç bir faydası yoxdur.
Xəfaci vurğulayıb ki, Quran fəaliyyətləri ilə məşğul olanlar Əfasinin bu davranışını qınamalı və rədd etməlidirlər, çünki bu, ilk növbədə özünə təhqirdir, sonra isə İslam Respublikasına.
“Quran təkcə gözəl səs deyil, möhkəm mövqe və doğru aqidədir”
İraq qarisi bildirib ki, Əfasinin mövqeyi onun əsl ideoloji və düşüncə dünyasını üzə çıxarır:
“Quran tilavəti təkcə gözəl səs deyil; iman, mövqe və haqq yolda sabitqədəm olmaqdır. Bu isə düşünən, basirətli insan tələb edir.”
O, İmam Əlinin (ə) Əmmar ibn Yasirə dediyi məşhur hadisəni xatırladıb:
“Bu kişinin səsinin təsirinə düşmə.”
Sonradan həmin qari İmamına qarşı çıxmışdı.
Əfasinin tilavətlərinin silinməsi və boykot çağırışlarına dəstək
Xəfaci Əfasinin tilavətlərinin silinməsi və onun nəğmə və qiraətlərinin boykot edilməsi çağırışlarını dəstəklədiyini bildirib və onun ardıcıllarını bu mövqelərinə yenidən baxmağa çağırıb.
O deyib ki, insanlar bəzən qarinin gözəl səsinə aldanaraq ona yüksək məqam verirlər, halbuki onun davranışı Quranın ruhu ilə uyğun olmaya bilər.
4348287
