Hindistanda bir müsəlman müəllimə hicab taxdığı üçün işdən uzaqlaşdırılıb
“İQNA”-nın “Muslim Mirror”-a istinadən verdiyi xəbərə görə, müsəlman müəllimənin şikayəti Hindistanda iş yerləri və təhsil müəssisələrində dini ayrı-seçkilik məsələsini yenidən gündəmə gətirib.
Müsəlman müəllimə Samrin Banu bildirir ki, Uttar-Pradeş ştatının Varanasi şəhərində təlim kursuna başladıqdan bir neçə gün sonra hicabına görə işdən çıxarılıb.
Banu Instagram-da paylaşdığı videoda müsəlman müəllimələrin qarşılaşdığı çətinliklərdən dərin məyusluğunu ifadə edib. O deyib: “Bu günün dövründə yeni başlayan bir müsəlman müəllim üçün peşəkar inkişaf çox çətindir.”
Onun sözlərinə görə, geniş yayılmış ayrı-seçkilik valideynlərin uşaqlarını müsəlman müəllimələrə göndərməsinə mane olur. Banu əlavə edib: “Hara getsəniz, istər sınaq dərsi, istər müsahibə üçün — sizi təkcə müsəlman olduğunuz üçün rədd edirlər.”
O həmçinin bildirib ki, uşaqlar qorxu və dini qərəzlə beyin yuyulmasına məruz qalır və bu da onların tədrisini çətinləşdirir. O soruşub: “Sinifə daxil olan kimi məndən nifrət edən bir uşağa müəllim necə dərs keçə bilər?”
Banu vurğulayıb ki, bütün dinlərə hörmət edir və heç vaxt öz inanclarını başqalarına sırımağa çalışmır. O, 9 may tarixində paylaşdığı başqa videoda bildirib ki, Benaresdəki Buda Dövlət Məktəbi ondan ya hicabını çıxarmağı, ya da məktəbi tərk etməyi tələb edib. Onun sözlərinə görə, müsahibə zamanı belə bir şərt qoyulmamışdı.
O, digər müəllimələrin dini kimliklərini göstərmək üçün sindur və manqalsutra taxdıqlarını xatırladanda, məktəbin direktoru belə cavab verib: “Məsələ bərabərlikdir. Hamı eyni deyil. Harada özünü rahat hiss edirsənsə, ora get.”
Banu məktəbi Hindistan Konstitusiyasının 25 və 19-cu maddələrinə əsasən dini azadlığını pozmaqda ittiham edib və hadisəni “müsəlmanlara qarşı mənfi təbliğat” adlandırıb.
O xəbərdarlıq edib ki, müəllimlərin yalnız dinə görə işə götürülməsi bu peşəni azlıqlar üçün getdikcə daha çətin vəziyyətə sala bilər.
4351555
