Qırğızıstanlı insan hüquqları fəalı: İranın Amerika ilə qarşıdurmada qələbəsi şəhid liderin rəhbərliyinin nəticəsidir
Qırğızıstandan olan insan hüquqları fəalı Tursunbek Akan İranın şəhid lideri ilə vida mərasimi çərçivəsində “İQNA”-ya verdiyi müsahibədə, şəhid liderin müxtəlif dinlərin dinc yanaşı yaşamasına verdiyi önəmə toxunaraq bildirib: “Bu gün Qırğızıstan müsəlmanlarının nümayəndəsi kimi İrana gəlmişəm və Mərkəzi Asiya ölkələri konqresində də iştirak edirəm”.
Qırğızıstanın da İran kimi çoxetnoslu və çoxmillətli bir ölkə olduğunu qeyd edən Akan deyib: “Qırğızıstanda yaşayan bütün etnos və millətlər Ayətullah Xameneiyə böyük ehtiram bəsləyirdilər. O, təkcə Qırğızıstan xalqı üçün deyil, həm də bütün dünya üçün açar lider idi”.
Akan əlavə edib: “Onun liderliyinin görkəmli xüsusiyyəti o idi ki, təkcə söz deməklə kifayətlənmirdi. O, 37 il ərzində İran İslam Respublikasının idarəçiliyini öz əlində saxladı və bu ölkə İsrail və Amerika ilə qarşıdurmada Ayətullah Xameneinin (r.ə) müdrik rəhbərliyi sayəsində qələbə qazana bildi”.
Şəhid liderin İranın müxtəlif etnosları arasındakı mövqeyini vurğulayan bu insan hüquqları fəalı bildirib: “Təkcə iranlılar deyil, İranın hər yerində yaşayan bütün etnoslar ona hörmətlə yanaşırlar”.
Tehrandakı “Məryəm ana (ə)” metro stansiyasına baş çəkdiyini qeyd edən Akan deyib: “Bizim üçün orada erməni dilində çoxlu yazıların olması və Həzrət Məryəmin (ə) adını daşıyan metro stansiyasının tikilməsi çox maraqlı idi. Bu hərəkət İranda yaşayan xristianlara göstərilən hörmətin nişanəsidir. İranda təkcə farslara və ya müəyyən bir etnosun nümayəndələrinə hörmət edilmir, bütün dinlərin nümayəndələri İslam Respublikası üçün hörmətli və əhəmiyyətlidir”.
Akan, Qırğızıstan müsəlmanları ilə İran arasındakı münasibətlər haqqında deyib: “Qırğızıstan müsəlmanları ilə İran arasında əlaqələr mövcuddur və xüsusilə son illərdə ticarət və iqtisadi münasibətlərin inkişafı ilə paralel olaraq bu əlaqələr də genişlənib”.
Tursunbek Akan sonda qeyd edib: “Müharibənin əvvəlində, Amerika və İsrail İrana hücum edərkən Qırğızıstan müsəlmanları İrana dəstəklərini elan etdilər və İran xalqının dəstəyi ilə bağlı bir çox proqramlar keçirdilər. Qırğızıstanın müsəlman cəmiyyəti də bu təcavüzü pislədi. Biz Qırğızıstan müsəlmanları ilə İran xalqı arasında çox gözəl münasibətlərin şahidi oluruq”.
Müsahibəni apardı: Seyid Meysəm Yaqubi
4362475
